WAN- Qeyûm pêşî navê “Navenda Jiyanê ya Zarokan a Hinarê” guherand û paşê jî navend girt. Li vê navendê tevgerîneke li hemberî pêgirtîbûna madeyê hebû.
“Navenda Jiyanê ya Zarokan a Hinarê” ku ji aliyê Şaredariya Artemêtan a Wanê li Taxa Suphanê hatibû vekirin, ji aliyê qeyûm ve pêşî navê wê hat guherandin û paşê jî hat girtin. Li vê navendê 300 perwerdekarên dildar hebûn û 85 xwendekar. Li hundurê navendê parka zarokan, qada basketbol û voleybolê, atolyeyên drama, şano, sinema û hwd. hebûn. Tevî dersên kurdî dersên zimanê rûsî, îngilîzî, fransî û tirkî jî dihatin dayîn.
‘QEYÛM DESTÛR NEDA’
Mamosteyê Zimanê Tirkî Taner Turumîş ku bi dildarî li navendê dixebitî, anî ziman ku wan ji bo zarokan li navendê gelek proje amade kiribûn, lê belê navend ji aliyê rêveberiya qeyûm ve hat girtin. Turemîş, bi bîr xist ku gelek kes ji bo bi dildarî bixebitin serî li navendê dabûn û her wiha civaknas û derûnas jî li navendê hebûn. Turemîş wiha got: “Wê ev navend ji bo me bibûna xebateke pîlot. Heke ev xebat bi ser biketana, wê li taxên cuda jî navendên bi vî awayî bihatanan vekirin.”
‘WÊ RÊ LI BER PÊGIRTIYA MADEYÊ BIGIRTANA’
Turemîş, bi bîr xist ku di demeke kurt de navend ji aliyê qeyûm ve hatiye girtin. Turemîş diyar kir ku di serdemeke ku wan xwendekara qeyd dikirin de navend hatiye girtin. Turemîş anî ziman ku armanca wan ew bû ku zarokan bînin gel hev û wiha got: “Bi taybetî jî di demên dawî de pêgirtiya madeyê zêde bûye û me yê ji bo vê yekê xebatên girîng bikiranan. Wê ev der ji bo têkoşîna li hemberî pêgirtîbûna madeyê roleke girîng nîşan bidana.” Turemîş diyar kir ku piştî temambûna navendê, di demeke kurt de wan xwe gihandiye zarokan û wan dest bi aktîvîteyan kiriye û wiha got: “Dema qeyûm ewil hat ji me re gotin ew ê navendê veguherînin qursa Qur’anê, lê bele niha girtiye.”