STENBOL - Komîsyona Girtîgehan a Şaxa ÎHD’a Stenbolê, di hefteya 329’emîn a çalakiya “Rûniştina F” de xwest girtî Abdulkadir Firat ê nikare bi tena serê xwe xwarin bixwe bê berdan.
Komîsyona Girtîgehan a Komeleya Mafê Mirovan (ÎHD) a Stenbolê, bi armanca balê bikişîne ser rewşa girtiyên nexweş, di hefteya 329’emîn a çalakiya “Rûniştina F” de li Qada Galatasarayê kom bû. Komîsyonê di çalakiya vê heftê de bal kişand ser rewşa girtiyê nexweş Abdulkadir Firat ê li Girtîgeha Tîpa T a Hejmara 1 a Tekîrdagê tê girtin. Di çalakiyê de pankartên “Tecrît dikuşe, piştevanî dide jiyîn” û “Tedawî mafe, nayê asteng kirin” hatin vekirin û bê navber dirûşmeya “Ji îşkenceya lêgerîna tazî û îşkenceya OHAL’ê re êdî bese” hatin berzkirin.
‘REWŞA FIRAT GIRAN DIBE’
Endama Komîsyonê Hatîce Onaran di çalakiyê de axivî û wiha got: “Divê mafê jiyanê yê hemû mirovan bê parastin. Girtiyê nexweş Abdulkadîr Firat ê 60 salî ji ber pirsgirêkên xwe yên tenduristiyê divê demildest bê berdan. Firat berî bê girtin, aliyekê wî felç bûye. Firat ê di sala 2013’an de hat girtin û aliyê wî yê rastê felçe û nikare tevger bike. Firat hêza aliyê xwe yê çepê jî winda dike. Li gorî rapora Desteya Tenduristiya Nexweşxaneya Lêkolîn û Perwerdê ya Erziromê, aliyê rastê yê bedana Firat 4/4 astengdare, bi tena serê xwe bi gopal tenê demek kin dikare li ser piyan bimîne, divê tim biçe kontrola norolojik û dikare bi tena serê xwe di girtîgehê bimîne. Di rapora dûre ji bo Firat hat dayîn de vê carê dibêje ‘nikare bi tena serê di girtîgehê de bimîne.’ Li ser vê yekê wî tînin Girtîgeha Metrîsê û dibin Desteya Tipa Edlî (ATK). Lê ATK jî, ji bo berdana Firat rapor nade.”
'DIVÊ FIRAT BÊ BERDAN'
Onaran, anî ziman ku divê firat bê berdan û wiha dawî li axaftina xwe anî: “Firat bi tena serê xwe nikare xarin bixwe. Divê demildest bê berdan. Em bang li rayedaran dikin ku mafê girtiyên nexweş nas bikin.”
Piştî axaftina Onaran çalakî bi berz kirina dirûşmeyan bi dawî bû.