ENQERE - Devlet Bahçelî, diyar kir ku peyamên Abdullah Ocalan maqûl in û got: “Îşala dê baskê duyemîn ê çûka aştiyê bê çêkirin û her kes dê bi hev re firîna wê bibîne.” 

 

Serokê Giştî yê MHP’ê Devlet Bahçelî, di Torena Sertfîkayê ya Dibistana Siyaset û Lîderiyê ya partiya xwe de axivî û bal kişand ser pêvajoyê û peyamên Rêberê Gelê kurd Abdullah Ocalan. Bahçelî, Bahçelî, diyar kir ku li dijî pêvajoyê hewldanên provakatîf hene lê tevî vê jî pêvajo qonax bi qonax pêş dikeve û ber bi encamê ve diçin. Bahçelî, got ku armanca wan a ji pêvajoyê, “Yekitî û xwişk-biratiya neteweyî ye.” 

 

‘GEFÊN KÛREWÎ Û HERÊMÎ HENE’

 

Bi domdarî Bahçelî anî ziman ku ew bi dilwêrekî di rêya xwe dimeşin û got: “Em hedefa xwe ya ‘Tirkiyeya bêteror’ bi aqil, exlaq û ronahiy edaletê dixwînin û li hemberî gefên kûrewî û herêmî dibin yek û ji bilî vê tu vebijêrkên din nabînin û nas nakin.” 

 

MÎMARÊ AŞTIYÊ 

 

Di berdewamê de Bahçelî bal kişand ser serdana komîsyonê ya Abdullah Ocalan û got: “Peyamên lîderê damezirîner ê PKK’ê maqûl in. Tu wateya berevajîkirina van peyaman nînin ku bi zanebûn tên kirin. Berevajî gelek erdnîgariyên niha di nava çirava pevçûn û rageşiyan de ne, welatê me hewl dide mîmariya aştiyê ya adilane, exlaqî û aqilane bixe meriyetê. Kî hewl bide pêşiya vê bigire, dê webalekî ku di her du dinyayan de nikare ragire bigire ser milên xwe.”

 

‘EM NIKARIN FIRSENDA SEDSALÎ JI DEST BIDIN’ 

 

Bahçelî, bal kişand ser gotina xwe ya “Aştî ne çûkekî yekbask e” ku piştî bangên Abdullah Ocalan û biryarên PKK’ê kiribû bi bîr xist û got: “Îşala dê baskê duyemîn ê çûka aştiyê were çêkirin û dê her kes firîna wê bibîne. Tişta firsenda tehemûlê, hevfêmkirinê û çareseriya bi rêyên diyalogê pêş dixe, nirxa demokratîk e. Em nikarin vê firsenda sedsalî ji dest bidin.”