MÊRSÎN - Li Tarsûsê li dermanxaneyekê şerek derket û di çapemeniyê de bi ser navê "Sûriyeyiyan bi ser eczaneyê de girt û xebatkarên wê derb kirin" hat serwîskirin. Lê belê derket holê ku yên tev li bûyerê bûne ne Sûriyeyî ne. Piştî bûyerê malbatên kesên hatin girtin, destnîşan kirin ku serê dîmenan û dawiya wan serwîsî çapemiyê nehatine kirin.
Di 30'yê Hezîranê de li navçeya Tarsûs a Mêrsînê di navbera xebatkarên dermanxaneya li hemberî Nexweşxaneya Dewletê ya Tarsûsê û mişteriyên dermanxentê de şerek rû da. Lê belê di çapemeniya herêmî û netewî de ev yek wekî "Sûriyeyî avêtin ser eczaneyê û xebatakarên wê derb kirin" hatibû serwîskirin. Lê belê hat diyarkirin ku şer di navbera kesekî ku xwestiye alîkariya kesekî sûriyeyî bike û xebatkarên eczaneyê de derketiye. Osman Altin, Şiyar Altin û Kemal Altinê ku di nav bûyerê de cih girtin piştî bûyerê bi 4 rojan hatin girtin û hat hînbûn ku li Haci Altin, Coşkûn Altin û Mûrat Demîrbaş jî digerin.
Roja bûyerê penaberê sûriyeyî Muslum Hasanê 67 salî ji bo alîkariya wî bike Haci Altin bi xwe re bir dermanxaneyê. Hasan anî ziman ku ji ber bi tirkî nizane axaftinê li wir hatine kirin fêm nekiriye, lê belê ewilî xebatkarekî dermanxaneyê êrîş kiriye. Hasan, da zanîn ku di êrîşê de Haci Altin kestiye rdê û got: "Paşê Haci bi telefonê li kesekî geriya û paşê şer mezin bû. Çavê min jî derb xwar."
HEQARET LI SÛRIYEYIYAN KIRIN
Fayik Altin ku birayê wî jê re behsa şer kiriye û berê rêveberê HDP'ê bûye, diyar kir ku birayê wî ji bo alîkariye Muslum Hasanê ku bi tirkî nizane bike pê re çûye dermanxaneyê. Altin got: "Diçin dermanxaneyê. Haci dibêje ev derman cuda ye û eger tune be ew ê ji cihekî din bikire. Di wê navê de kesê li dermanxaneyê çêran ji welatiyê sûriyeyî re dibêje. Birayê min jî jê re dibêje çima çêran dike. Dema birayê min dpirse, dibêje 'ez ji te re jî çêran dikim' û bi vî awayî munaqeşe dest pê dike."
Altin, destnîşan kir ku kesê li dermanxaneyê dixebite werzîşvan e û di kulma ewil de birûyên birayê min diçirin. Altin, da zanîn ku di wê kêlikê de birayî wî ji dêvla li polîsan bigere gazî birazî û xwarziyên xwe dike, lê belê ev yek ne rast e. Altin, destnîşan kir ku paşê bi tevlîbûna parlementerên CHP'Ê yên Mêrîsnê Alî Mahîr Başari û Alpay Antmen daxuyanî tê dayîn û bûyer tê provekirin. Altin bilêv kir ku li Tarsûsê malbata wan tê naskirin û bi vî awayî tê xwestin ku îtibara malbata wan bêx erabkirin. Altin, xwest li dîmenên dermanxaneyê bê nerîn û kifş bibe ka kî şer derxistiye.
TEVAHIYA DÎMENAN NEHAT NÎŞANDAN
Parêzerê malbatê Mert Keleşoglû jî, diyar kir ku dîmenên di çapemeniyê de hatine serwîskirin ne tam in. Keleşoglû, anî ziman kukesê tev li nav şer bûye ne xebatkarê dermanxenyê ye, tenê wê rojê ji bo alîkariya dermanxeneyê bike hatiye û got: "Di serê vîdeoyê de dixuyê ku ev kes êrîşî Haci Altin dike û li wî dide. Di dawiya vîdeoyê de jî di dest wî de kêr dertê derve. Lê belê di dîmenên ku li ser înternetê hatin serwîskirin de ev tişt tune ne û di dîmenên di dest polîsan de jî ev tune ne."
Keleşoglû, xwest ku demildest tevahuya dîmenan bên parvekirin û sûcdar diyar bibin.