WAN - Nûçegîhana Ajansa Mezopotamya (MA) Seda Taşkin ku girtî tê darizandin dê cara duyemîn derkeve pêşberî dadgehê. Parêzera Taşkin, Gulan Çagan Kalelî, diyar kir ku tu delîlên din li dosyayê nehatiye zêdekirin û wiha got: "Em bang li cemaweriyê dikin ku tev li danişînê bibin."
Nûçegîhana Ajansa Mezotopamya (MA) Seda Taşkin, ku di 20'ê Kanûna 2017'an de li Mûşê hat binçavkirin, piştî 4 rojan di bin çavan de ma, bi şertê kontrola edlî serbest hat berdan. Li ser îtîraza dozger Taşkin, di 22'ê Çile de li Enqereyê hat binçavkirin û hat girtin. Taşkin cara ewil bi riya SEGBÎS'ê li Dadgeha Sulh Ceza ya Bedlisê îfadeya wê hat girtin. Taşkin, bi îdîaya “Endamtiya rêxistinê" hatibû girtin û şandibûn Girtîgeha Jinan a Sincan ê.
DIVÊ TAŞKIN BÊ BERDAN
Danişîna ewil a Taşkin li 2’yemîn Dadgeha Cezayê Giran a Mûşê hat dîtin. Taşkin bi îdiaya “Propagandaya rêxistinê kiriye” û “Endama rêxistinê ye” tê darizandin. 2'emîn danişîna doza Taşkin dê 2'ê Tîrmehê li 2'emîn Dadgeha Cezayên Giran a Mûşê bê dîtin. Parêzera Taşkin, Gulan Çagan Kalelî, diyar kir ku tu delîlên din li dosyayê nehatiye zêdekirin û wiha got: "Em bang li cemaweriyê dikin ku tev li danişînê bibin. Em hêvî dikin ku di vê rûniştinê de Taşkin bê berdan. Darizandina Taşkin, mînaka darizandina çapemeniya azad e. Di şexsê Seda de dixwazin ajansa lê dixebite jî rol û misyona wê darizînin. Ji Taşkin dipirisin ku çima hatiye li Mûşê nûçe çêdike. Bi qasî ez dizanim kes nikare bêje çima tu diçe bajarekî din nûçe çê dike. Hemû xebatên hatine kirin xebatên rojnamegeriyê ye. Ji ber vê yekê divê Taşkin bê berdan."