NAVENDA NÛÇEYAN - Nivîskarê Rojnameya e-rojname Mehmet Emîn Yildirim encama hilbijartinê nirxand û diyar kir ku serketiyê vê hilbijartinê HDP ye.
Nivîskarê rojnameya e-rojname Mehmet Emîn Yildirim, di qunciknivîsa xwe ya vê hefteyê de bal kişand ser encama hilbijartina 24'e Hezîranê û diyar kir ku li gel ku hilbijartin di şertê OHAL'ê de hêk hatiye û AKP-MHP'ê hemû derfetên dewletê bikar anîye jî HDP'ê bend derbas kiriye. Yildirim, da zanîn ku hêza AKP û MHP'ê şikestiye û pêvajoyek dijwar li pêş hikûmetê ye.
Nivîsa Mehmet Emîn Yildirim a îro di rojnameyê e-rojname de hat weşandin wiha ye:
Hilbijartinên 24’ê hezîranê yên serokkomariyê û parlamenteriyê li Kurdistan û Tirkiyeyê di bin Rewşa Awarte de û ji aliyê AKP û MHP’ê ve bi bikaranîna hemû derfetên dewletê, zext û zordariya li ser hêzên demokrat, azadîxwaz û sosyalîstan ve pêk hat. Jixwe Erdogan aşkera dianî ziman ku her çi be jî divê HDP di bin benda hilbijartinê de bimîne. Ev yek li tevahiya Kurdistanê bi taybetî jî li navçeya Pirsûsê ya Rihayê ji aliyê hêzên paramîlîter, polîs, leşker û cerdevanan ve pêk hat. Sê endamên HDP’ê li Pirsûsê hatin qetilkirin, bi dehan welatparêzên kurd û endamên HDP’ê yên demokrat û sosyalîst hatin girtin û birîndar bûn. Êrîş birin ser gelek bûroyên HDP’ê; gule berdan bûroyan û ew şewitandin. Ji bo ku kampanyayên HDP’ê asteng bikin her cureyên zext û zordariyê xistin dewreyê. Desthilatdariya AKP û MHP’ê biryar dabû ku her çi be jî HDP di bin benda hilbijartinê de bimîne. Rexmî van hemû zext û zordariyên AKP û MHP’ê jî HDP ji vê hilbijartinê bi serkeftî derket. HDP li 11 bajarên Kurdistanê bû partiya yekemîn. Her wiha li dehan navçeyan jî bi rêjeya ji sedî 60 heta ji sedî 80 û zêdetirî wê deng girt. Tayyîp Erdogan û qelemşûrên wî li cihê ku digotin xendek çêbûne gel piştgiriyê nade, bi girtina ji sedî 80 û 90’î, yên ku di binê sindoqan de man polîtîkayên dagirkerî û komkujiya Erdogan bû. Gelê kurd careke din îrade û rûmeta xwe parast, li dijî dagirkeriyê serê xwe netewand û li şehîdên xwerêvebirina demokratîk xwedî derket. Peyama ku dan hêzên dagirkeriyê ev bû; hûn nikarin îradeya gelê kurd bişikînin. Ev helwesta gelê kurd hêjayî pîroziyê ye. Her çiqas encamên hilbijartinê bi awayekî fermî nehatibe eşkerekirin jî HDP nêzî ji sedî 12 deng girt. Lê pir diyar e ku ev rêjeya dengê wê hîn zêdetir e. Li dijî dagirkeriyê potansiyela hêzên demokratîk û sosyalîst hîn zêde ye. Eger israra di berxwedanê de berdewam bike, tifaqa gelê kurd, tirk û hêzên sosyalîst, demokrat û azadîxwaz bê xurtkirin ew ê rê nede ku desthilatdariya faşîst a AKP û MHP’ê demdirêj û mayînde be.
Di vê hilbijartinê yek jê yê ku wenda kir AKP ye. Rexmî hemû fen û fûtan, bi bikaranîna derfetên dewletê jî encax ji sedî 42 û tiştek deng girt. AKP di pêvajoya helandin û têkçûnê de ye. Li hemberî têkoşîna gelan ev têkçûna AKP’ê ew ê berdewam bike. Diyar e ku desthilatdariya faşîst a AKP û MHP’ê li hemberî Tevgera Azadiyê, hêzên azadîxwaz û demokratîk ew ê şerekî dijwar bidomîne. Pêwîst e ji encama hilbijartinê hêz bê girtin û berxwedan jî di asteke radîkal de bê bilindkirin.
CHP heta ku meseleya kurd bi awayekî adilane û bi wêrekî nexe rojeva xwe ew ê nikaribe xwe ji vê handîkapê xilas bike. Di hilbijartinê de dîsa xwe dubare kir. Muherrem Înce ji aliyê CHP’ê ve derket pêş, ev yek jî ji bo CHP’ê ew ê bibe pirsgirêk yan jî bibe sedema pêşketinekê di rojên pêş de ew ê bê xuyakirin. MHP bi derfetên dewletê, bi zext û zordariyê benda hilbijartinê derbas kir. Di vê hilbijartinê de rola ku Akşener li hemberî MHP’ê bilîze encam negirt.
Ji vir şûnde karê AKP û MHP’ê dê ne hêsan be. Hem di parlamentoyê de hêza wan bi piranî hat şikandin, hem jî li hemberî desthilatdariya faşîst potansiyeleke xurt a berxwedanê heye. Dê ev potansiyela heyî zêde xwe bi rêxistin bike, xwe bike xwedî hêz dê desthilatdariya faşîst a AKP û MHP’ê têk bibe.