Dozgerê Amedê, der barê endama Meclîsa Dayika Aştiyê ya 62 salî Havva Kiran, Mehmet Onat û Mehmet Necat Şamar de bi îdîaya tev li meş û xwepêşandanan bûne, Beştarî merasima cenazeyan bûne û tev li civîna KCD'ê bûne, doz vekiribû. Dozger ji 15 salan heta 30.5 salan cezayê girtîgehê dixwaze. Yekemîn rûniştina doza endama Meclîsa Dayikên Aştiyê Heva Kiran û Mehmet Onat û Mehmet Necat Şamar li 8'emîn Dadgeha Cezayên Giran a Amedê hat ditin. Dozger der barê Kiran, Onat û Şamar de bi îdîaaya "Avakirin û rêvebirina rêxistinê", “Endamtiya rêxistinê", "Li dijî zagona civîn û meşê derketiye" û "Propaganda rêxistinê kiriye" ji 15 salan heta 30,5 salan cezayê girtîgehê xwest. Di rûniştina dozê de Kiran û Şamar ên ku serbest tên darizandin û parêzerên wan amade bûn. Onat jî tev li rûniştina dozê nebû. Mehmet Necat Şamar diyar kir ku wî îdîaname nexwendiye. Dadger jî got "Ma ji tere neşandin?". Şamar jî got 'Ji min re CD yek şandin. lê ji ber ku dema ez binçavkirim bîlgisayara min desteser kirin min nekarîbû bixwînim." Şamer, îdîayên der barê xwe de red kir û diyar kir ku ew bê sûc e. 

 

JI BO MIROV NEYÊN KUŞTIN EZ AXIVÎM

 

Piştre dayika Aştiyê Hava Kiran a 62 salî jî bi kurdî parastin kir. Kiran, diyar kir ku ji bo leşker û gerîlla neyên kuştin axivîye û wiha got: "Ez dayika aştiyê me. Ji bo leşker û gerîlla nayên kuştin ez axivîm. Min tu sûc nekiriye. Xwendin û nivîsandina min tune ye. Mirovek xwendin û nivisandina wê tune be dê çawa rêxistinê ava bike?" Kiran sûcên der barê xwe de red kir û beraata xwe xwest. 

 

Parêzera Kiran Reyhan Yalçindag jî diyar kir ku dayikên zarokên wan li çiyê ne ji bo şer bi dawî bibe Meclîsa Dayikên Aştiyê ava kirine û wiha got: "Ji bo zarok û ciwan neyên kuştin û xwîn nerije têdikoşin. Li ser azadiya ol û wîcdan aştîyê dixwazin. Em van sûcdariyan qebûl nakin. Em dixwazin kêmasiyên di dosyaye de bên temamkirin. 

Heyeta dadgehê jî piştî navberê doz taloqî meha çile kir.