NAVENDA NÛÇEYAN - Endamê Konseya Rêveber a PJAK’ê Siyamend Mûînî diyar kir ku hewceye hêzên Kurd ên li Îranê di vê pêvajoyê de li gorî berjewendiyên gel bi hev re tevbigerin. 

 

Şerê Îran û Îsraîlê di roja 7’emîn de berdewam dike. Endamê Konseya Rêveber a PJAK’ê Siyamend Mûînî têkildarî geşedanên heyî ji ANF’ê re axivî. Mûînî, anî ziman ku krîza li Rojhilata Navîn bi şerê Îsraîl-Îranê re derbasî qonaxeke nû bûye. Mûînî, diyar kir ku di bingeha vî şerî de polîtîkayên sîstemên netewe dewletan heye ku gelan û cihêrengiyan înkar dikin û hewl didin tune bikin. Mûînî destnîşan kir ku şerê navbera Îran û Îsraîlê şerê li herêmê wê hîn giran bike û ragihand ku ev şer xizmetê ji azadiya gelan re nake, encameke ji hesabên desthilatdariya herêmî ya herdu dewletan e.

 

‘EM Ê GELÊ XWE JI WÊRANIYA ŞER DÛR BIGIRIN’ 

 

Mûînî diyar kir ku weke PJAK'ê wê hewl bidin gelê Kurd ji bandora hilweşîna a şer vegire û destnîşan kir ku têkildarî şer û encamên wê, ew her tim amade ne. Mûînî, bi bîr xist ku gelê Îranê bi salan di bin zexta rejîma Molla û xizaniya aborî de hate hiştin û got: “Gelê Kurd û gelên din divê li pêşberî vê pêvajoyê amade bin. Bi taybetî gelê Kurd divê di vê pêvajoyê de di nava yekîtî û rêxistiniyê de tevbigerin. Eger em bi têrkerî ne amade bin, dibe ku rejîma Îranê bi zilma xwe ya faşîst êrîşî gelê me bike. Ji ber vê yekê wezîfeya me ya bingehîn parastina gelê me ye."

 

‘EM LI DIJÎ HER CURE DESTWERDANAN AMADE NE’ 

 

Mûînî diyar kir ku ji aliyê siyasî û leşkerî ve ew li hemberî her cure destwerdana li gelan amade ne û ev tişt anî ziman: “Heke êrişek li ser gelê me bê kirin, em ji bo her cûre destwerdanê amade ne." Mûînî bang li hêz û partiyên siyasî yên Kurd ên li Îranê hemûyan kir ku cudahiya xwe ya siyasî û îdeolojîk bidin aliyekî, bi hev re tevbigerin û got: “Hêzên Kurd di vê pêvajoya dîrokî de divê ji aliyê îdeolojîk, siyasî û leşkerî ve li heman eniyê bin. Ev enî jî divê ji bo parastina berjewendiyên gelê me yên li hemberî rejîmê be."