MÊRDÎN – Hevserokê Giştî yê HDP'ê Sezaî Temellî di mîtînga partiya xwe ya Mêrdînê de derbarê gotinên Wezîrê Karê Hundurîn Suleyman Soylû yên derheqê Pirsûsê de got: "Ev bûne makîneya derewan. Hemû Mêrdîn bê gel hev jî nikare dereweke wisa li hev bîne."
Bi beşdarbûyîna Hevserokê Giştî yê HDP'ê Sezaî Temellî û siyasetmedar Ahmet Turk li navçeya Artûklû ya Mêrdînê bi tevlîbûna bi hezaran kesî mîtîngek hat lidarxistin. Di mîtînga ku li Parka Karayollariyê hat lidarxistin de namzetên HDP'ê hatin nasandin. Di mîtîngê de peymana Parlementera HDP'ê ya Mêrdînê ya girtî Gulser Yildirimê jî hat xwendin. Di dema xwendina nameya Yildirimê de dirûşmeyên "Girtiyên siyasî rûmeta me ne" hatin berzkirin.
TURK: NE HOSTE EW NABE ŞAGIRT JÎ
Ahmet Turk destnîşan kir ku 24'ê hezîranê ji bo guherîn û veguherînê firsendeke e. Turk, diyar kir ku di mîtînga Serokê Giştî yê AKP'ê û Serkomar Erdogan de ku roja berê li Mêrdînê hatibû lidarxistin, karmend û xebatkarên şaredariyê bi gefan anîne qada mîtîngê. Turk ku got "Hûn mirovên rûmetdar in, hûn ê ji rûmeta xwe tawîz nedin" diyar kir ku demokrasî bi çewisandinan nameşe. Turk bang li Erdogan kir û got: "Eger tu hoste bûna, te gel anîn hemberî hev. Te cihêkarî xist navbera kurd û tirkan. Bila serokomarekî ku berberîbûnê dixe navbera gelan û civakê dike dijminê xwe li qisûrê nenê re ne hoste, nikare bibe şagirt jî."
‘VÎ GELÎ NE SERÎ TEWAND NE JÎ ÇOK DANÎ'
Piştî axaftina Ahmet Turk, Hevserokê Giştî Sezaî Temellî li ber çepik û tilîliyan dest bi axaftina xwe kir û got: "Em ê bibin kevirî bibin Demîrtaş û em ê bi ser serê wan de bibarin." Temellî destnîşan kir ku ew ê di 24'ê Hezîranê de tevî benda hilbijartinê ew pêşdarazên ku xistine navbera mirovan birûxînin û got: "Ji bo mirov cihêkariyê bikin çi ji destên wan tê dikin. Hîle û xurdeyên ku nayên aqilê mirovan dikin. Li nav çavê mirovan dinerin û derewan dikin. Dibêjin qey em ê dev jê berdin. Ma me kengî dev jê berdaye? Vî gelê rûmetdar tu carî ne serî tewandiye ne jî çok daniye. Em ê xwedî li dengê xwe derkefvin û vê lîstikê xera bikin."
‘WEZÎRÊ KARÊ HUNDURÎN BÛYE MAKÎNEYA DEREWAN'
Temellî kesên ku beriya cejna Remezanê di êrîşa AKP'iyan de li Pirsûsê jiyana xwe ji dest dan bi bîr anî û bal kişand ser daxuyaniyên Wezîrê Karê Hundurîn ên derbarê mijarê de. Temellî got: "Rûyê wî qet sor nabe. Tim derewan dike. Serokomar û serokwezîr derewan dikin. Wezîrê Karê Hundurîn bûye makîneya derewan. Dibêje ji ber ku Birêz Înce serdana Birêz Demîrtaş kiriye wisa bûye. Mêrdîn hemû bê gel hevdu jî nikare derewke wis ali hev bîne. Sûcdar li ser sûc hat zevtkirin. Ji ber wê panîkê nizanin dê çi bibêjin. Li nexweşxaneyê li ber çavê mirovan û walî 3 mirov hatin qetilkirin. Baş dizanin sûcdar kî ye û sûc çî ye. Lê berî ku demeke dirêj di ser re derbas bibe heqîqet derket holê. Dê ev kes di 24'ê Hezîranê de biçin, dê edalet bê vî welatî. Û dê darazeke serbixwe hesabê van bê edaletiyan hemûyan bipirse. Dê daraz ji wesayeta qesrê xelas bibe. Soza herî biqîmet a ku em bidin gel ev e."
Piştî axaftina Temellî bi hezaran kes li ber stranên hunermend Hediyeyê govend gerandin.