Rêberê Gelê Kurd Abdullah Ocalan di 4’ê Nîsana sala 1949’an de li gundê Amarayê yê navçeya Xelfetî ya Rihayê ji dayik bû. Amadekariyên ji bo pîrozkirina rojbûna 76’emîn a Abdullah Ocalan temam bûn. Rojbûna Abdullah Ocalan dê di 3-4’ê Nîsanê de li Parka 4’ê Nîsanê ya li navenda navçeya Xelfetiyê bi mihrîcanekê were pîrozkirin. Mihrîcan dê bi pêşengtiya Platforma Saziyên Demokratîk were lidarxistin û ji gelek bajaran dê gelek kes tev li bibin. 

 

AMADEKARÎ TEMAM IN

 

Hevşaredara Xelfetiyê Saniye Bayram ku li şûna wê qeyûm hatiye tayînkirin anî ziman ku amadekariyên wan temam bûne û got: “Em ê 4’ê Nîsanê rojbûna Serok bi mihrîcanekê pîroz bikin. Bi taybet jî divê jin û ciwan biherikin vê mihrîcanê. Em ê bi mihrîcanê re nîşan bidin ku xwedî li Serok derdikevin.” 

 

'ROJBÛNA GELAN E’

 

Hevşaredar Mehmet Karayilan ku li şûna wî qeyûm hatiye tayînkirin jî ev tişt anî ziman: “Banga me ji bo hemû gelan e; werin em vê rojê bi hev re pîroz bikin. Banga birêz Ocalan ne tenê ji bo gelê Kurd e, ji bo hemû gelên li vê xakê dijîn e. Werin em bi pîrozbahiyan xwedî li vê manîfestoyê derkevin. Mesele ne tenê rojbûnek e, mesele zayîna demokrasî û aştiyê ya ji bo gelan e. 4’ê Nîsanê rojbûna gelan e û pîroz be.” 

 

Biraziyê Abdullah Ocalan, Alî Ocalan jî hemû gel vexwend mihrîcanê û got: “Werin em 4’ê Nîsanê bi hev re û bi coşeke mezin pîroz bikin.” 

 

'DÊ XWEDÎ LI BANGÊ DERKEVIN’

 

Ji Tevgera Jinên Azad (TJA) Naîme Bayram jî anî ziman ku dê jin û ciwan xurt tev li mihrîcanê bibin û xwedî li “Banga Aştî û Civaka Demokratîk” derkevin. Naîme Bayram, got: “Birêz Ocalan destê aştiyê dirêj kir. Divê em bi hev re bi vî destî bigirin û di mihrîcanê de govendeke mezin bigerînin. Tirk, Kurd, Ermen, Elewî û her kes vexwendiyên vê govendê ne. Ol, ziman û baweriya kê çi dibe bila bibe em her kes vedixwînin vê pîrozbahiyê.” 

 

HEMÛ GEL VEXWENDÎ NE

 

Hevserokê Federasyona Komeleyên Hiqûq û Piştevaniyê ya bi Malbatê Girtî û Hikûmxwaran re ya Mezopotamyayê (MED TUHAD FED) Kerem Canpolat jî bal kişand ser banga Rêbêrê Gelê Kurd Abdullah Ocalan û got: “Divê tevahiya gelê me xwedî li vê bangê derkeve. Di pîrozbahiyan de dê peyama xwedîderketina li bangê were dayin. Em ê biisrar qala çareseriya demokratîk a pirsgirêka Kurd bikin. Em ê israr bikin ku dewlet gavan biavêje. Em ê di 4’ê Nîsanê de li Amarayê careke din nîşan bidin ku xwedî li Banga Aştî û Civaka Demokratîk derdikevin. Divê her kes ji bo aştiyê berê xwe bide Amarayê.” 

 

Parlamentera DEM Partiyê ya Amedê Ceylan  Akça jî anî ziman ku geşedanên dîrokî diqewimin û ji bo bilindkirina dengê aştiyê banga tevlibûna pîrozahiya rojbûnê li her kesî kir. 

 

MA / Emrullah Acar