MÛŞ - Endama Komeleya Alimên Olê ya Mûşê Oya Yildirim HTŞ ji bo Elewî û baweriyên din ên li Sûriyeyê xetereye û got: “Li dijî polîtîkayên înkar û redkirinê yên li Rojhilata Navîn, divê her kes li dora Îslama Demokratîk bicive.”
Piştî hilweşîna rejîma Esad û Heyet Tahrîr el Şam (HTŞ) li Sûriyeyê bûye îktîdar, êrişên ser Elewiyan û baweriyên cuda didomin. Li gorî daneyên Çavdêriya Mafên Mirovan a Sûriyeyê (SOHR), di encama êrişên hêzên girêdayî HTŞ’ê yên ji 6’ê Adarê heta niha de li Laziqiye û Tartusê zarok û jin jî di nav de 745 Elewî hatin qetilkirin. Ji ber êirşan bi sedan malbat neçar man ku ji herêmê koç bikin. Cihên hatine valakirin jî hatin talankirin.
Endama Komeleya Alimên Olî ya Mûşê Oya Yildirim têkildarî êrişan û xetereyên li herêmê axivî.
BERTEK NÎŞANÎ BÊDENGIYÊ DA
Oya Yildirim, anî ziman ku li ser Elewî û baweriyên din ên li Sûriyeyê xetere heye û got: “Mafê derdorên cuda heye ku bi azadî bijîn. Ev êriş ne tenê li ser Elewiyan e, li ser tevahiya gel û neteweyên din jî polîtîkayeke tirsandin, bêzarkirin û dîktayê ye. Ev polîtîkayên zextker û Îslam hevdu nagirin. Em van êriş û komkujiyên di bin navê olê de tên kirin qebûl nakin.”
Bi domdarî Oya Yildirim anî ziman ku êrişên HTŞ’ê dişibin êrişên DAIŞ’ê yên di navbera 2014-2015’an de û wiha pê de çû: “DAIŞ’ê jinên Êzidî dîl girt, mirov qetil dikir. HTŞ jî jinan tune dihesibîne û êrişî Elewiyan dike. Heta ku bêdengiya li dijî van êrişan bidome, dê ev êriş berdewam bin. Dê berdewamiya wan hêj xerabtir be. Divê kesek li dijî vê bêdeng nebe. Her kesên ji xwe re dibêjin mirov divê bi dengekî xurt li dijî van êrişan derkeve.”
TÊKILIYÊN HTŞ-TIRKIYEYÊ
Di berdewamê de Oya Yildirim bal kişand ser têkiliyên Tirkiye û HTŞ’ê û ev tişt anî ziman: “Raste rast nebe jî berpiryartiya Tirkiyeyê jî di van êrişan de heye. Gelek caran bi HTŞ’ê re hevdîtinan dikin. Agahiya Tirkiyeyê teqez ji komkujiyan heye. Nekarî pêşiya ewqas komkujiyan bigire, qet nebe bila pêşiya yên ji vir û şûnde bigire. Li dijî komkujî û mirinan em her tim bi aştiyê re bûn û dê wisa be jî. Ji bo welêt, pêdivî bi aştiya civakî û civaka demokratîk heye. Bendewariya me ya ji Tirkiyeyê ew e ku bi awayekî aştiyane nêzî rewşa navxweyî ya Sûriyeyê bibe.”
BAL KIŞAND SER ÎSLAMA DEMOKRATÎK
Oya Yildirim, destnîşan kir ku êriş, komkujî û siyaseta di salên dawî de bi navê Îslamê tên kirin tu eleqeya xwe bi Îslamê re nîne û got: “Li dijî feraseta Îslama heyî, li dijî polîtîkayên înkar û redkirinê yên li Rojhilata Navîn, divê her kes li dora Îslama Demokratîk bicive ku gel bikarin azad û wekhev bijîn. Em van polîtîkayên qirêjî yên di bin navê olê de tên kirin nas nakin. Divê mirovahî bibe yek û pêşî li qirkirinan bigire. Ev jî tenê bi wê pêkan e ku li dora Îslama demokratîk bicivin. Banga min ji bo her kesî ye; werin em bi hev re civaka demokratîk û azad ava bikin. Em aştiyê bînin hemû cîhanê. Birêz Ocalan bi banga xwe nîşanî hemû cîhanê da ku aştiyê dixwaze. Divê dewlet demildest gavên pêwîst biavêje. Em piştgiriyê didin pêvajoya birêz Ocalan daye destpêkirin. Di serî de Kurdistan ev pêvajo dê ji bo hemû gelan bi xwe re aştî û jiyaneke azad bîne.”
MA / Mazlum Engîndenîz