SÊRT - Namzeta HDP’ê ya Sêrtê Meral Daniş Beştaş, diyar kir ku desthilatdariya AKP’ê bi polîtîkayên şer xetabên hilbijartinê bi rêve dibe û got: “Operasyonên Efrîn û Qendîlê xebatên ji bo hilbijartinê bûn.”
Namzeta Parlamenteriya Partiya Demokratîk a Gelan (HDP) Meral Daniş Beştaş, derbarê hilbijartina 24’ê Hezîranê de axivî û wiha got: “Desthilatdariya heyî, êdî nikare welat bi rêve bibe. Gel êdî dixwaze ji AKP’ê rizgar bibe. AKP hewl dide HDP’ê dibin bendê de bihêle û giştiya meclîsê bixe destê xwe. AKP bi hîle û nelirêtiyan dixwaze di vê hilbijartinê de bi ser bikeve. Ji ber vê yekê êrîş dike. Serokê Giştî yê AKP’ê mezinahiya hiqûqê nas nake û êrîşî HDP’ê dike. Ji bo vê fermanan dide û mirovan teşwîq dike.”
‘HEWL DIDIN BI SER BÛYERA PIRSÛSÊ BIGIRIN’
Beştaş, di dewama axaftina xwe de wiha got: “Em bi tabloyek êrîşê HDP’ê kirin, dengdêr tirsandin, gef xwarin û heya kuştinê çûyîn re rû bi rû ne. Bûyera li Pirsûsê ya li nexweşxanê hat jiyîn derket holê. Me derbarê bûyerê de raporek amade kir. Li gorî vegotinên şahidên bûyerê, li wê derê polîs hebûne û tenê bûyer temaşe kirine. Em baş dizanîn ku xizmên namzetê AKP’ê di nexweşxanê de dikandarê Pirsûsê kuştin. Piştî komkujiyê kamerayan dişkînin. Desthilatdarî hewl dide bi ser bûyerê bigire û bûyerê li gorî desthilatdariya xwe veguherine, lê her ku vê yekê dike, têk diçe. Gava em li vê bûyerê mêze dikin, em dibînin ku dozger û daraz li Tirkiyeyê ne azadin.”
‘HDP JI 50 MILYON DENGDÊRAN DENGAN DIXWAZE’
Beştaş, da zanîn ku HDP ji 50 mîlyon dengdêran dengan dixwaze û wiha dewam kir: “Ji ber ku HDP wekheviya hemû welatiyan û azadiya wan diparêze. Em pirsgirêka bendê ji holê rabkin û bendê derbas bikin. Desthilatdariya AKP’ê bi polîtîkayên şer xetabên hilbijartinê bi rêve dibe. Operasyonên Efrîn û Qendîlê xebatên ji bo hilbijartinê bûn. Li Efrînê starta vê yekê da. Niha hewl dide bi Qendîlê xebatên hilbijartinê temam bike. Jiyana mirov û zarokên me ji bo berjewendiya desthilatdariya xwe bi kar tîne. Ez bang li hemû dayîkên Kurd, Tirk û dayîkên din dikim ku zarokên we ji hemû hilbijartinan bi nirxtirin. Ez naxwazin li ser xwîna mirovan siyaset bê kirin û ji bo ev yek neyê kirin em dixebitin.”
‘SÊRTÊ DEST JI DOZA AZADIYÊ BERNEDAYE’
Meral Daniş Beştaş, di dawiya axaftina xwe de wiha got: “Sêrt qada ku Botan û Garzan li hev kom dibe ye. Sêrt bi xweza, mirov, dildariya azadiyê û xîreta têkoşînê, di dîrokek nêzde mora xwe li dîrokê xistiye. Li ser Sêrtê gelek zext hene. Qeyûm tayînê hemû şaredariyê wê kirin. Hevşaredarên wê avêtin girtîgehan. Parlamentera Sêrtê Besîme Konca girtin û wekîltiya wê betal kirin. Lê gelê Sêrtê dest ji têkoşîn û hezkirina xwe ya azadiyê berneda. Em vê bangê li gelê xwe yê Sêrtê dikin, em li dijî vê têrsê serî hildidin. Em bi cesareta xwe hêviyan mezin dikin. Em ê her tim ligel we bin. Her ku ew hewl didin me têk bibin, cesareta me mezintir dibe û emê vê cesaretê li hemû deran belav bikin.”