ENQERE– Platforma Hilbijartinê ya Adil ku ji aliyê 17 saziyan ve hat avakirin, dê roja hilbijartinê bi milyoneke peywirdar sindoqan biparêze.
CHP, HDP, Partiya ÎYÎ, SP û DÎSK û KESK jî di nav de gelek sendîka û rêxistinên demokratîk hatin gel hev û Platforma Hilbijartinê ya Adil ava kirin. Endamê platformê Tayfûn Îşbîlen, anî ziman ku ew ê roja hilbijartinê bi milyonek kesî li qadê bin û sindoqan biparêzin. Îşbîlen ji bo ewlehiya sindoqan bang li welatiyan kir, ji bo şik û gumanên di vî warî de ji holê bên rakirin divê serî li platformên di vî warî û partiyên siyasî yên nêzî xwe dibînin bidin û peywirê bigirin.
JI BO HER SINDOQEKÊ HERÎ KÊM DU PEYWIRDAR
Îşbîlen, diyar kir ku di çarçoveya xebatên hilbijartinê de wan heta niha nêzî 500 hezar kesî ji bo sindoqan peywirdar kiriye û ligel endamên desteya sindoqê xebatên wan ên ji bo muşahidan jî didome. Îşbîlen got: "Ji bo her sindoqê peywirdarên me hene. Ligel vê em ê roja hilbijartinê 500 hezar muşahidan jî peywirdar bikin. Heta niha hema bêje me xwe gihandiye nîviyê vê hedefê. Hîn jî welatî serî li platformê didin. Di vê çarçoveyê de em bang li welatiyan dikin ku dengê xwe bi kar bînin û ji bo ewlehiya sindoqan bibin muşahid."
Îşbîlen, anî ziman ku ligel ewlehiya sindoqan ji bo encamên hilbijartinê jî bi raya giştî re parve bikin xebatên wan ên di vî warî de didomin. Îşbîlen, diyar kir ku ji bo şeva hilbijartinê rê li ber manîpulasiyonan bigirin ew ê kêlî bi kêlî encaman bi raya giştî re parve bikin.
HERÎ KÊM 50 HEZAR PARÊZER
Her wiha Îşbîlen diyar kir ku, ji bo roja hilbijartinê mudaxileyî rewşên neyînî bikin ew ê herî kêm bi 50 hezar parêzerî re tevkariyê bikin û wê pêwendiyê bi baroyan re deynin.
Îşbîlen, anî ziman ku di dema avakirina platformê de wan AKP û MHP'ê jî vexwandiye û got: "Lê belê ew daxilî vê yekê nebûn. Bila ji xebatên ku em dikin ev tişt neyê fêmkirin; tenê em ê xwedî li dengên muxalefetê dernekevin. Em ê xwedî li hemû dengan derkevin. Ev nayê wateya ku em ê xwedî li dengên AKP'ê jî dernekevin."
Îşbîlen, destnîşan kir ku eger di warê dengan de pirsgirêk rû bidin ew ê dengên ku ji aliyê YSK'ê ve bên daxuyandin û yên platformê berawirdî hevdu bikin.
MA / Hayri Demir