Rojnameger Necla Demîr Arvas, Rahîme Karvar, Ahmet Guneş, Welat Ekîn, Vedat Oruç û Reyhan Hacioglû di 17’ê Çileyê di çarçoveya lêpirsîna navenda wê Stenbolê de hatin binçavkirin û di 20’ê Çileyê de bi îdiaya ‘endamtiya rêxistinê’ hatin girtin. Rojnameger Eylem Babayîgît jî di 22’yê Çileyê de hate girtin. Rojnameger Ahmet Guneş, di roja îdianameya wî hatibû amadekirin de hate berdan. Dîroka danişîna doza rojnameger Eylem Babayîgît, Necla Demîr Arvas û Welat Ekîn diyar bûn lê ji ber biryarên bêrayetiyê yên dadgehê, dîroka danişîna dozên rojnameger Reyhan Hacioglû, Rahîme Karvar û Vedat Oruç hêj nehatine diyarkirin. 

 

Danişîna ewil a doza Eylem Babayîgît dê di 19’ê Adarê de li 22’yemîn Dadgeha Cezayên Giran a Stenbolê were lidarxistin. Serokê Giştî yê Sendîkaya Çapemenî Weşan û Xebatkarên Çapxaneyê ya Konfederasyona Komeleyên Karkerên Şoreşger (DÎSK Basın-Îş) Turgut Dedeoglû û Hevdîrektorê Xebatên Medya û Hiqûqê (MLSA) Veysel Ok banga tevlibûna danişîna Eylem Babayîgît kirin. 

 

Dedeoglû, diyar kir ku binçavkirin, girtin û darizandina rojnamegeran a ji ber xebatên pîşeyî di mijara azadiya fikr û xweîfadekirinê de rê li ber fikarên mezin vedike û got: “Sepanên bi vî rengî bandoreke neyînî li ser mafê agahîgirtinê yê civakê jî dike. Azadiya çapemeniyê nebe nabeya civakan e. Divê li dijî zexta îktîdar û darazê ya li ser rojnamegeran têkoşîneke piralî were dayin. Ev jî bi rêxistiniya hiqûqî, civakî û navneteweyî pêkan e. Divê temamiya civakê piştgiriyê bide rojnamegeran û nehêlin ku xwe bi tenê hîs bikin. Ji bo avakirina eniyeke hevpar a li dijî zextan hewcehî bi bihêzkirina sendîkayan heye. Têkoşîna azadiya çapemeniyê ne tenê ya rojnameeran, pirsgirêka hevpar a tevahiya civaka demokratîk e. Lewma hewldaneke hevpar pê divê. Heke çapemenî azad be civak dikare azad be.” 

 

'PÎŞEYA ROJNAMEGERAN TÊ DARIZANDIN’ 

 

Bi domdarî Dedeoglû anî ziman ku divê rewşeke ku rojnameger bikarin bi awayekî azad karê xwe bikin bê avakirin û wiha pê de çû: “Mafê darizandina adilane girîng e. Di esasê xwe de di şexsê Eylem Babayîgîtê de pîşeya rojnamegeriyê tê darizandin. Ji bo mezinkirina piştevaniyê û parastina rojnamegeriyê, em bang dikin. Eylem Babayîgît rojnameger e û rojnamegerî sûc nîne. Piştevanî dê me tevan bihêz bike. Di danişînê de em bi hempîşeya xwe re bin û pîşeya xwe bi hev re biparêzin.” 

 

'GELEK TIŞT DIKEVIN SER MILÊ ROJNAMEGERAN’ 

 

Veysel Ok jî daxuyand ku demekî dirêj e li Tirkiyeyê zextên giran li ser rojnamegeran hene û wiha dirêjî da axaftina xwe: “Lê di vê demê de zextên girantir hene. Hema hema dozên hemû rojnamegeran hene, hatine binçavkirin, kontrola edlî hene, hatine girtin û ev hejmar roj bi roj zêde dibe. Dema li Tirkiyeyê demokratîkbûn dixitime, dewleta hiqûqê ji holê radibe û siyaset dixitime, zextên ser rojnamegeran gelek zêdetir dibin. Em niha di serdemeke wiha de ne. Armanca esasî jî ew e ku rojnamegeran bêzar bikin, daxwaza xebata wan tune bikin û hemû qadê ji medyaya alîgir re bihêlin. Di vê serdemê de gelek tişt dikevin ser milê rojnamegeran.” 

 

'DIVÊ EM PIŞTEVANIYÊ XURTIR BIKIN’ 

 

Ok, got ku Eylem Babayîgît bi awayekî neheq hatiye girtin û axaftina xwe wiha qedand: “Divê di danişîna sibe de were berdan. Lingê herî girîng ê li dijî van zextan, têkoşîn e. Fikrên siyasî, netew û ola rojnamegeran çi dibe bila bibe divê em li cem hemû rojnamegerên binçavkirî, girtî û rastî zextê tên bisekinin. Bi vî awayî em dikarin ser bikevin. Divê piştevanî bê xurtkirin.” 

 

MA / Yeşîm Tukel