Ofîsa Rizgarbûyên Dîlên Êzidiyan ên Başûrê Kurdistanê hejmara Êzidiyên di fermana 3’yê Tebaxa 2014’an de hatin qetilkirin û windakirin aşkera kir. Ev agahî bi rengekî ne fermî hatin aşkerakirin. Li gorî daneyên ofîsê, heya niha zêdetirî belgeyên 5 hezar kesên hatine qetikirin hatine tomarkirin û 2 Hezar û 745 zarok jî sêwî ne. Hejmara gorên komî yên hatine dîtin zêdetîrî 96’an e û bi dehan yên yek yek jî hene. 

 

Yên ku ketin destê DAIŞ’ê bi giştî hejmara wan 6 hezar û 417 kes in ku ji wan jî 3 hezar û 548 jin, 2 Hezar û 869 jî mêr in. Yên ji destê DAIŞ’ê hatin rizgarkirin bi giştî hejmara wan 3 Hezar û 558 kes in ku ji wan hezar û 211 jin, 339 mêr, hezar û 47 zarokên keç û 961 jî zarokên xort in.

 

Hejmara dîlên ku bi destê DAIŞ’ê hatine qetilkirin û cenazeyên wan di nava gorên komî de hatine dîtin û radestî malbatên wan hatin kirin 274 in ku ji wan jî 37 jin û 237 mêr in.

 

Yên ku hejmara wan hate diyarkirin û tesbîtkirin ku hatine qetilkirin lê çarenûsa wan ne diyar e yan jî hîna li tipa edlî ya Bexdayê têne rawestandin, 2 Hezar û 558 kes in ku ji wan jî hezar 225 jin û hezar 333 mêr in.

 

Hêjayî bibîr xistinê ye ku heya niha zêdeyî 200 hezar kes ji civaka Êzidî di nava kampan de li başûrê Kurdistanê dijîn û rê nayê dayîna wan ku vegerin cih û warên xwe.