ŞAHBA - Bi hezaran welatiyên Efrînê, bi armanca şermezarkirina operasyona Tirkiye ya li dijî Efrînê û komên çekdar ên girêdayî wê û bêdengiya qada navneteweyî ya li hemberî dagirkirina Efrînê, li kantona Şehbayê çalakî li dar xistin.
Bi hezaran welatiyên Efrînê yên ji cih û warên xwe koç kirin û li Şahba bi cih bûne, bi armanca dagirkeriya li ser Efrînê şermezar bike meşek girseyî pêk anî. Çalakî bi dirûşma "Ji bêdengiya cîhanê re na, serkeftin a gelê Efrînê ye" pêk hat. Di meşê de bi hezaran welatiyên Efrîniyên yên li kampên kantona Şehbayê bicih bûne amade bûn. Di meşê de endamên desteyên rêveberiyên xweser, Kongreya Star, Tevgera Civaka Demokratîk, Meclisa Malbatên Şehîdan a Kantona Efrînê, Meclisa Kantona Şehbayê û gelek welatiyên ji pêkhateyên ereb û tirkmen jî amade bûn. Girsê, di meşê de wêneyên Rêberê PKK'ê Abdullah Ocalan, alên YPG/YPJ’ê, TEV-DEM'ê û pankartên "Em nabin hevkarê kujer Erdogan" û "Ji bêdengiya hêzên navneteweyî re na" rakirin. Welatiyên ku li ber Navenda Heyva Sor a Kurd dest bi meşê kirin, ber bi Qada Ehrezê ve çûn. Di meşê de welatiyan dirûşmên ‘Bijî berxwedana serdemê’ û ‘Bijî Serok Apo’ berz kirin.
‘BÊDENGIYA CÎHANÊ ŞERMEZAR KIRIN'
Meşa efrîniyan li Qada Ehrezê veguherî mîtîngê. Li ser navê girseyê endama Meclisa Kantona Şehbayê Henan Osman daxuyanî xwend. Osman, helwesta Tirkiye û komên çekdar ên girêdayî wê şermezar. Osman, bêdengiya qada navneteweyî ya li hemberî dagirkirina Efrînê jî bi tundî şermezar û xwest Tirkiye dest ji dagirkirinê berde. Osman herî dawî wiha got: "Dê tu hêz nikaribe têkoşîna gelê kurd bişikîne û vîna gelê kurd teslîm bigire."
Li ser navê Kongreya Star jî Emîne Dîngîlî axivî û diyar kir ku Erdogan û hevkarên wî dê tu carî nikarin gelê kurd ji hev qut bikin û wan têk bibin. Meşa li dijî dagirkeriyê bi dirûşmên "Bijî berxwedana gelê kurd", "Bijî berxwedana Efrînê" û "Bijî Serok Apo" bi dawî bû.