ENQERE – Girtiyê bi navê Emre Can Demîr bêyî xwesteka xwe sewqî girtîgeha Tîpa S ya Kavak a Samsunê hat kirin û ji bo lêçênûn kargoyê 5 hezar TL ji Demîr xwestin.
Emre Can Demîrê ku di sala 2016'an de li Antalyayê hat girtin û 50 caran cezayê muebetê lê hat birîn, di sala 2020'an de ji Girtîgeha Tîpa L a Antalyayê ya ku lê dihat ragirtin, sewqî Girtîgeha Tîpa H a Eskîşehîrê hat kirin. Demîr ê li korîdora ku girtiyên edlî lê dihatin ragirtin, ji ber ku li vir qawîşa siyasî tunebû, xistin hucreya yek kesî. Demîr ku ji bertekên li dijî tecrîdê encam negirt, di 5'ê Kanûna 2024'an de şandin Girtîgeha Tîpa S ya Kavak a Samsûnê. Demîr li vir jî di nava şert û mercên tecrîdê de tê girtin.
LI GIRTÎGEHÊN CUDA HEMAN PÊKANÎN
Demîr duh di axaftina xwe ya bi telefonê ya bi malbata xwe re diyar kiribû ku li Girtîgeha Tîpa S ya Kavakê ya Samsûnê ku sewqî wî hatiye kirin rastî binpêkirina mafan hatiye. Li gorî agahiyên ku malbata wî dane; Demîr diyar kir ku di korîdora ku girtiyên edlî yên li Girtîgeha Tîpa S a Kavakê de tên ragirtin, di hucreya yek kesî de hatiye bicihkirin û ji ber ku lêgerîna tazî qebûl nake der barê wî de lêpirsîn hatiye vekirin. Demîr jî ji malbata xwe re got ku ji aliyê girtiyên edlî ve rastî heqaretan hatiye. Demîr, anî ziman ku her tim ji aliyê girtiyên edlî ve rastî gefan tê û got ku di serlêdanên ku ji bo biçin korîdora ku girtiyên siyasî lê tên ragirtin de bersiveke erênî negirtiye.
5 HEZAR TL MESREFÊN KARGOYÊ
Demîr ji malbata xwe re da zanîn ku ji bo eşyayên wî yên şandin Girtîgeha Tîpa S ya Kavak a Samsunê 5 hezar TL heqê kargoyê xwestine. Demîr ji malbata xwe re got ku ew ê serî li kiryarên derqanûnî yên li ser wî nedin û diyar kir ku ger daxwazên wî neyên qebûlkirin dê bikeve greva birçîbûnê.
4 SAL IN KURÊ XWE NABÎNE
Bavê Demîr Hasan Demîr, diyar kir ku ew jî 4 meh berê ji ber sûcên siyasî ji girtîgehê derketiye, bi şertê kontrola edlî hatiye berdan û ji ber ku rojê 2 caran îmze diavêje 4 sal e nikare kurê xwe bibîne. Bav Demîr wiha got: "Cara herî dawî em bi telefonê bi kurê xwe re axivîn, kurê min ji ber dûrbûn û sedemên aborî nexwest em biçin hevdîtina wî. Yekane daxwaza min ew e ku kurê min hema rojê saetek be jî bi hevalên xwe re derkeve qada servekirî. "
‘DENGÊ RÊHEVALEKÎ BES E’
Parêzera Emre Can Demîr prz. Zelal Aydogan di sala 2024’an de li Girtîgeha Tîpa H a Eskîşehîrê serdana wî kiribû û wiha got: "Ji min re gotibû di her şert û mercî de ez dikarim bijîm. Ez gazinan jî ji wan nakim. Hebûna rêhevalekî, dengê hevalê min bes e ku ez bijîm. Di vê dinyaya min di hişê xwe de afirandiye de nikarin min tenê bikin."