Zanyarê navdar ê Tirkiye û Teorîsyenê Peresanê Alî Demirsoy, li ser pergala perwerehiyê ya Tirkiye, polîtikayên AKP'ê ya li dijî perwerdehiyê û rakirina dersa Teorîya Peresana ji Ajansa Mezopotamya re axivî. Demirsoy, diyar kir ku rakirina dersa Teorîya Peresanê ne tiştekî ji rêzê ye û wiha got: "Di esasê xwe de dixwazin rakirina dersa kurama fikrê ya ji dibistanan mejiyê xwendekaran kor bike û rê li pêş fikrê bigirin û wiha got: "Di cîhanê de li 2 welatan dersa Teorîya Peresanê li dibistanan tune ye. Yek jê Afganistan ya din jî Erebistan e. Îro li Îranê ku rêveberiya wê şerîet e jî ev ders heye. Ji ber ku teorîya Peresanê rê li pêş guhertin, veguhertin û pêşketinên nû vedike. Civakê ji her tiştî re amade dike."

 

‘PÎVANÊN 1500 SAL BERÊ DISPÊRIN CIVAKÊ'

 

Demirsoy,  anî ziman ku hikûmet bi van guhertinan pîvanên hezar û 500 sal ango 2 hezar sal berê dispêrin civakê û wiha berdewam kir: "Li ser ruyê cîhanê ji sedî 99’ê zindiyan xwe diguherîne. Li cihekî wisa teknîk û zanist pêş ketiye de, spartina pîvanen 1500-2000 sal berê dê civakê ji holê rake. Fikara me ya sereke em dê bi vê guhertinê deriyê xwe ji tiştên nû û pêşketinên nû re bigirin." 

 

HÎNDEKARÊN ZANÎNGEHAN AZAD NAFIKIRIN

 

Demîrsoy, anî ziman ku li Zanîngehên Tirkiye 100 hezar hîndekar hene û wiha bi dawî kir: "Ez ne bawerim ku hemu hîndekarên zanîngehan azad difikirin. Mirovên ku ne azad bin, nikarin fikrên xwe jî bêjin. Kesê ku fikrên xwe nebêje ew ne azad e. Bi vî şiklî zaningeh bi rêve naçin. Dewleta Osmanî 600 salan li ser 38 welatan dakirkeri kir. Wê demê îro çima ji Împaratoriya Osmanî derziyek jî li pey xwe nehiştiye. Pirtûkek helbest û romanan jî li pey xwe nehiştiye. Huner jî li pey xwe nehiştiye. Împaratoriya 600 salan hikum bike û tiştekî li pey xwe nehêle wê demê perwerdehiya wê bê watey e. 400 salan li Misire mane. Lê der barê pîramîtan de tiştekî nizanin. Di navbera mirovan û sewalan de cudahiya herî mezin meraq û fikr e." 

 

MA / Kenan Kirkkaya