MÊRSÎN - Desteserkirina Şaredariya Akdenîzê hat şermezarkirin. Di çalakiyê de wihab hat gotin: "Berxwedana me wê heta dawiyê dewam bike."
Girtina Hevşaredarên navçeya Akdenîz a Mersînê Hoşyar Sariyildiz û Nûriye Arslan û endamên Meclîsa Şaredariyê Ozgur Çaglar, Neslîhan Orûç û Hîkmet Bakirhan, her wiha desteserkirina şaredariyê hate şermezarkirin.
Çalakî li Parka Ozgur Çocûk hate lidarxistin û parlamenterên DEM Partiyê, hevşaredar, endamên Meclîsa Dayikên Aştiyê, nûnerên partiyên CHP, TÎP, EMEP, rêxistinên civakî yên demokratîk û gelek kes tevlî bûn. Di çalakiyê de pankarta bi nivîsa "Rejîma qeyûm darbeya li dijî îradeya gel e" hate hildan û dirûşma "Qeyûm darbe ye, Na ji darbeyê re" hatin qîrîn.
Hevseroka DEM Partiyê ya Mersînê Bedriye Kûş axivî û got: "Hevalên me bi hincetên bêhiqûqî hatin girtin. Em vê biryara bêhiqûqî ti carî nas nakin û em ê heta dawiyê li ber xwe bidin."
Di daxuyaniyê de hat destnîşankirin ku rejîma qeyûm ne tenê li dijî gelê Kurd her wiha li hemberî îadeya siyasî ya gelên Tirkiyeyê gefeke.
Parlamentera Rihayê ya DEM Partiyê Dîlan Kûnt Ayan jî got, "Akdenîz Agirî, Riha, Dîlok, Semsûr e. Kurdistan e. Li vê derê jiyaneke hevpar hate avakirin. Qeyûm li dijî vê yekê darbe ye. Em ê bi têkoşîneke hevpar careke din wan têk bibin."
Parlamentera Mersînê ya DEM Partiyê Perîhan Koca anî ziman ku qeyûm ne rewa ey û got, "Em rewa ne. Em ê bi ser bikevin. Berxwedana me wê heta dawiyê dewam bike."
Serokê Mersînê yê TÎP'ê Ahmet Paket jî got, "Ew çiqasî desteser bikin, em jî ewqasî bi inat in. Em ê bi hev re bi ser bikevin."
Serokê Mersînê yê EMEP'ê Sedat Başkavak jî got, "Heta ku Akdenîzê bi dest bixin em ê têkoşîna xwe dewam bikin."
Piştî axaftinan girseya gel ber bi şaredariyê ve meşiya.
Li Akdenîzê gel guh neda bendan
BER BI ŞAREDARIYÊ VE MEŞIYAN
Tevî mudaxeleya polîsan jî, gel paşve gav neavêt û bi dirûşmeya “Em ê bi berxwedanê bi ser kevin” meşa xwe dewam kirin. Dayikên Aştiyê bi gotina “Em ji we û çekên we jî natirsin” nerazîbûna xwe nîşan dan. Li vir nûçegihana PÎRHA’yê Fatoş Sarikaya ji aliyê polîsan ve hat derbkirin.
Gel barîkatên polîsan hilweşandin û bi berzkirina dirûşmeyan ber bi şaredariyê ve meşiyan. Meş piştî ku rêyên diçin şaredariyê hatin girtin, li ber avahiya bajêr a DEM Partiyê ku nêzî şaredariyê ye bi dawî bû.
Parlamenterê DEM Partiyê yê Bedlîsê Hûseyîn Olan li vir axivî û got, “Li vir 3 roj in bêhiqûqiyek heye. Ev bêhiqûqî bi desteserkirina îradeya gel dewam kir. Hevrêyên me bi biryarek dijhiqûqê hatin girtin. Hewl dan mafê me yê nerazîbûnê, desteser bikin. Daxwaza me ya çûyîna ber şaredariyê bi awayekî bêhiqûqî hat astengkirin. Ev gel ti carî li ber we serî nedanî û dê nedane jî. Em ê ti carî teslîmê we nebin. Ev gel dê îradeya xwe teslîmê we neke. Di van rojên ku behsa aştiyê tê kirin de we şaredariya gel desteser kir. Qeyûm ne tenê pirsgirêka DEM Partiyê pirsgirêka her kesî ye. Ev gel sed sal in serî li ber we nedaniye. Dev ji desteserkirina îradeya gel berdin. Em ê xwedî li şaredariyên xwe derkevin.”
Di çalakiyê de ji bo meşa saet di 19:00’an a li ber avahiya navçeya Akdenîz a DEM Partiyê bê lidarxistin, bang hat kirin.