MÊRSÎN - Rojnameger Şirîn Çoban pişî ji Girtîgeha Tîpa T a Tarsusê hat berdan, der barê zext û îşkenceya li girtîgehê de axivî, da zanîn ku wan bi berxwedanê hin tişt bi dest xistine. Çoban da zanîn ku li girtîgehê muameleya keyfî dewam dike û wiha got: "Piştî berxwedana girtiyên jin, vê carê êrîşê girtiyên siyasî yên mêr kirin û îşkence li wan kirin."
Di 9'ê Îlona 2016'an de bi Biryara di Hukmê Qanûnî (KHK) rojnameya Azadiya Welat hat girtin û xebatkarên wê Şirîn Çoban û Îlker Îlkan bi îdiaya "endamên rêxistinê ne" û "propagandaya rêxistinê kirine" hatin girtin. Piştî 13 mehan di girtîgehê de man serbest hatin berdan. Çoban aşkera kir ku li girtîgehê zext û îşkence ji roja ku hatine girtin heta niha dewam dike.
Çoban da zanîn ku dema hatiye girtin birine Girtîgeha Tîpa C a Tarsusê û li vir 8 mehan girtî maye û piştre sirgûnî Girtîgeha Jinan a Tîpa T a Kampusa Saziyên Înfazê ya Girtîgeha Tarsusê û wiha got: "Em bi kom^ne 10 kesî birin girtîgehê. Dema em bi hevalan re birin hêj me piyê xwe neavîtibû hundur em bi erdê re kaş kirin û bi lêdanê em birin odeya tazîkirinê û li vir 7 gardiyanan êrîşê me kir. Bi piyên xwe pêl serê hevalan dikirin û ev gardiyanên mêr yên îşkencekar bûn."
LI BER ÇAVÊ MUDUR ÎŞKENCE
Çoban piştrast kir ku ev hemû li ber çavê midurê girtîgehê qewimîn; lê xwe bêdeng kirine. Çoban da zanîn ku li ser vê hevalên wan xwestine bi midur re hevdîtinê pêk bînin; lê bersiva ku girtine dîsa îşkence bûye û ev tişt got: "Dema em li dij derdiketin leşker û gardiyanan bi pehnan bersiv didan me. Piştre qêrîn zêde bûn û hevalek me berê xwe dan kamerayê got 'ev îşkence di kîjan edaletê de heye', leşker û gardiyana bi kenî bersiva 'hemû kamera girtî ne, kes dengê we nabihîse' da. Îşkenceyê dewam kir."
GARDIYANLAR: JI WE RE AV TUNE
Çoban destnîşan kir ku polîs, cendirme û gardiyanan ew bi dijwarî derb kirine û qasî 10-15 rojan bi tu awayî tedawiya wan nehatiye kirin û ew nebirine revîrê û wiha dirêjî da axaftina xwe: "Ji xwe ne pêlavê me jî di nav de tu tişt ne li gel me bû, dema em sewq kirin me tiştek negirt. Hêj kampus di rewşa înşaetê de bû. Av jî nedidan me. Gardiyanan digotin ku 'Di rojê baranê de jî ji we re av tune'. Me dixwest em rapora derbkirinê bigirin, piştî mehekê em birin. Ji xwe şop ji laşê me çibûn. Ji ber piyên me pêxas bûn tev bûn birîn."
'DESTEYA A' Û KOMA ÎŞKENCEYÊ HEBÛ
Çoban piştrast kir ku li girtîgehê "Desteya A" (A Takimi) ya li girtîgehê wekî koma îşkenceyê tê zanîn hebû û wiha pê de çû: "Ez bi hevaleke xwe re ji bo hevdîtina bi parêzer re derbasî odeyê bûm. Piştî hevdîtin qediya vê Desteya A û leşkeran di hola girtîgehê de em deb kirin û heta koxûşê em birin. Li kampusê zextên gelekî cidî hene û bi pêkanînên wekî lêgerîna tazî û rûmet şikandinê êrîşê girtiyan dikin. Qet ji bîra min naçe, ji Girtîgeha Mûşê dayikek 85 salî hatibû. Ev dayika bi saetan li ser piyan û piyên tazî dabûn rawestandin. Bifikirin tişta tînin serê vê dayikê, hûn pêkanînên din li ber çavan bigirin."
Çoban da zanîn ku ji ber îşkenceyê greva birçîbûnê dane destpêkirin û bi berxwedana wan re beşekî şertên wan hatine sererastkirin û der barê girtiyên mêr de jî ev tişt got: "Piştî berxwedana me, vê carê bi ser girtiyên mêr de çûn. Bi taybetî jî hevalên rojnameger. Di serî de Erdogan Alayumat û Serkan Erdogan gelek hevalên me derb kirin. Ew avêtin odeyên sunger. Lê zextên li wir dewam dikin."
MA / Ergîn Çaglar