Bertekên li hemberî êrişên dewleta tirk û Artêşa Neteweyî ya Sûriyeyê (ANS) yên li dijî Bakur û Rojhilatê Sûriyeyê didomin. Endama Meclisa Şaredariya Wan Tûşbayê Leyla Çelîkê got: "Di asta ku em gihîştine de, divê êdî qetilkirina gel, jin û zarokan çênebe. Divê em li aliyê aştiyê bin, ne li aliyê şer. Pêwîst e gel bi hemû cudahî û pêkhateyên xwe ve bi awayekî aştîxwaz tevbigerin. Li gorî min divê em bêdeng nemînin. Şoreşa jinê û destkeftiyên jinan tê armanckirin, divê em jî wekî her kesî li dijî van êrişan bisekinin. Divê em qebûl nekin û ji bo vê rewşê divê em dengê xwe bilind bikin. Ji bo bihêztir bibin divê em bibin yek." 

 

'LI ROJAVAYÊ SIVÎL TÊN QETILKIRIN'  

 

Hevserokê DBP'ê yê Navçeya Seravê Tûncer Kalkalî diyar kir ku êrişên li ser Rojavayê komkujiyeke li dijî gelê sivîl e û got: "Hemû tiştên gelên li wir dijîn hatin tunekirin. Em careke din diyar dikin ku em ê xwedî li Rojavayê derkevin. Em ê beşdarî çalakiya nobedê ya ku li Pirsûsê tê lidarxistin bibin. Û em ê bi hev re Rojavayê biparêzin. Rojava ne bi tenê ye. Îro pêwîst e hemû gelên cîhanê Rojavayê biparêzin. Em şer naxwazin. Ji ber ku gelê Rojava kurd e, ev komkujî tên kirin. Li Rojavayê sivîl tên qetilkirin."

 

'ROJAVA NE BI TENÊ YE'

 

Welatiyê bi navê Ahmet Sari jî anî ziman ku sedema qetlîamên li Rojavayê li dijî gelê sivîl nehezimkirina kurdan e û wiha got: "Tirkiye bi pêkhateyên ku berê jê re digotin 'terorîst' tevdigere. Sedema vê yekê tenê ew e ku dixwazin li wir gelê kurd tune bikin. Çareseriya van hemû pirsgirêkan paradîgma û ramanên Birêz Ocalan e ku dê van pirsgirêkan û şeran rawestîne. Komkujiyên li dijî birayên me yên li Rojavayê didomin. Di destekî wan de çîçek heye, di destê din de ço. Li gorî encamên hevdîtinên ku hatine kirin, yekane kesê ku em jê piştrast in, paradîgma birêz Ocalan e." 

 

Welatiyê bi navê Senar Alataş diyar kir ku hemû kurd birayên hev in û ya li Rojavayê tê kirin li hemû gelê kurd tê kirin û got ku yekane çareserî naskirina statuya gelê kurd e.

 

'POLÎTÎKAYA ŞERÊ QIRKIRINÊ'

 

Hevseroka Kooperatîfa Kargehên Çandiniyê yên Wanê Caziye Dumanê jî diyar kir ku desthilat li dijî destkeftiyên kurdan şer dike û wiha got: "Îradeya mezin a gelê kurd heye û vîna gelên bindest ên li dijî van êrişan li ber xwe didin heye. Têkoşînên mezin tên meşandin. Li dijî êrişan meyla êrişa li ser çar parçeyên Kurdistanê bi taybetî jî li ser Rojavayê encama polîtîkayên wan bi xwe ye. Eşkere ye ku Rojava ji bo me xwedî nirx û girîngiyeke mezin e. Tevgera kurd cihekî xwedî wateyeke dîrokî ye, li her çar parçeyan. Ji bo gel çavkaniya baweriyê ye. Çiqas rastiya wê were înkarkirin jî, divê were zanîn ku berxwedana li dijî polîtîkaya tê meşandin tawîz nade û îrada wê teslîm neyê girtin."