NAVENDA NÛÇEYAN - Rêxistinên rojnamegeran ên Herêma Federe ya Kurdistanê bertek nîşanî qetilkirina rojnameger Nazim Daştan û Cîhan Bîlgîn dan û gotin: “Dewleta tirk bi qetilkirina rojnamegeran re sûcê şer kiriye û em bi tundî şermezar dikin.”
Bertekên li dijî qetilkirina rojnameger Nazim Daştan û Cîhan Bîlgîn ên dema ku li Bakur û Rojhilatê Sûriyeyê nûçe dişopandin di 19’ê Kanûnê de bi SÎHA’yên dewleta tirk hatin qetilkirin, her ku diçe zêde dibin. Rêxistina Kompanya Çetir a ji bo Xebatên Medyayê, Rojnamegerên Jin ên Başûrê Kurdistanê û Rêxistina Ronusê daxuyanî dan û qetilkirina rojnamegeran şermezar kirin.
‘ROJNAMEGERIYA AZAD JI HÊLA DÎKTATORAN VE HEDEF TÊ GIRTIN’
Kompanya Çetir, bi beşdariya gelek rojnamegeran daxuyanî da. Di daxuyaniyê de hate gotin ku di bin desthilata rejîmên dîktator de gihandina rastiyê zehmet bûye, faşîzm bi her rê û rêbazê hewl dide ku tekane deng be û ji bo vê jî bi her awayî êrişî dengên beramber dike. Bi domdarî hat diyarkirin ku rojnamegeriya azad ji ber ku rastiyê hildigire, bi her awayî ji aliyê dîktatoran ve tê hedefgirtin.
Di berdewamê de wiha hate gotin: “Dewleta Tirk a dagirker ku zêdetirî sedsaleke bi hemû hêza xwe ve gelê Kurd qetil dike, bi hevkariya çeteyên xwe êrişek berfireh û dijwar li dijî destkeftiyên gelê Kurd û gelên din ên li Sûriyeyê. Bi taybet li Kobanê û hewl dide bi rêya şerê derûnî civakê bê hêvî bike. Ji bo vê yekê jî hemû dezgehên çapemeniyê yên dewleta Tirk wek navenda şerê taybet kar dikin û rastiyan vedişêrin. Li beramber da rojnamevanên azad hewl didin ku li dijî şer derbikevin û bibin dengê azadîxwazan.
Êrişên li ser rojnamevanan kiryarên terorîstî ne ku ji aliyê dîktatoran ve ji bo veşartina rûyê rastiyan tên pêkanîn. Dewleta Tirk di vî alî de ji bo rojnamegeran bûye goristan û bi awayekî sîstematîk êrişî wan dike. Li aliyek ku rojnamevan bi Danezana Gerdûnî ya Mafên Mirovan tên parastin û divê neyên hedefgirtin. Lê em her roj dibin şahidê kiryarên terorî yên dewleta Tirk yên li dijî rojnamegeran.
Di nava 4 mehên borî de bi dehan rojnamevan bi awayek raste rast ji aliyê balefirên bê mirov û bi çek ên dewleta Tirk a dagirker ve hatine hedef girtin ku di encama van êrişan de 5 rojnamevan hatin şehîdxistin û gelek rojnamevan jî birîndar bûn.” Bi domdarî rojnamegerên li Başûrê Kurdistanê hatine qetilkirin bi bîr xist û wiha got: “Dewleta tirk a dagirker di 19’ê Kanûnê de jî wesayîta ku rojnameger Nazim Daştan û Cîhan Bîlgîn tê de hedef girt û şehîd xist. Ajokarê wesayîtê jî birîndar bû.
BI NÛÇEYÊN XWE ŞERÊ TAYBET VALA DERXISTIN
Her du rojnamevan di şopandina êrişên dewleta Tirk a dagirker ên li ser Bendava Taşirîn û bajarê Kobanê yên rojên dawî de rolek aktîf lîstin. Wan karî rastiyan ji raya giştî re ragihînin û ragihandina şerê taybet derewîn derbixînin. Girînge ku bê gotin hedefgirtina van rojnamevanan kiryareke terorîstî ya plankirî bû. Bêdengiya cîhanê ya li hemberî kiryarên terorîstî yên dewleta Tirk, rewşeke metirsîdar derxistiye holê û bûye sedema berevajîkirina rastiyan. Em dixwazin bi helwestek hevpar pêşî li van sûcan bigirin û dawî li siyaseta kuştin û girtinê ya rojnamegeran bînin. Divê li qada navxweyî û navneteweyî li dijî dewletên sûcdar têkoşîneke hiqûqî bidin meşandin.
BANGA LI MEDYAYA KURDÎ KIRIN
Em bang li medyaya Kurdî û navneteweyî, her wiha rêxistinên mafên mirovan dikin ku li hemberî her êrişeke li dijî rojnamegeran berpirsyariyên xwe bi cih bînin. Her wiha daxwaz ji raya giştî ya cîhanê dikin ku li ser qetilkirina rojnamevanan ji aliyê dewleta Tirk ve bêdeng nemînin û sînorek ji bo kiryareên dewleta faşîst a Tirkiyeyê diyar bikin. Jiyana rojnamevanan biparêzin û ji bo karê wan şert û mercên guncaw peyda bikin. Divê mafê civakê yê wergirtina agahiyan bê parastin.”
Li ser navê rojnamevanên jin ên Başûrê Kurdistanê Tewar Adil diyar kir ku hedefgirtina rojnamevanan ji aliyê dewleta Tirk ve, tirsa wî ya ji rojnamevanên azad derdixe holê û got: “Emê li ser rê û şopa rojnamevanên şehîd berdewam bikin.”
ROJNAMEGERÊN JIN ÊN BAŞÛRÊ KURDISTANÊ BERTEK NÎŞAN DAN
Rojnamegerên Jin ên Başûrê Kurdistanê jî li Navenda Metro ya li Silêmaniyeyê, daxuyanî dan. Li ser navê rojnamegeran Tewar Adil axivî. Tewar Adil diyar kir ku Çapemeniya Azad li hemberî êrişên dewleta Tirk ên ser gelê Kurd, ji bo ronîkirina rastiyan rolek girîng dilîze. Tewar Adil, got: “Hedefgirtina rojnamevanên azad ji aliyê dewleta Tirk ve derdixe holê ku ew dewletê çiqas ji rojnamevanên azad ditirse. Me di dema borî de şahîdî ji şehîdxistina rojnamevanên jin Nagihan Akarsel, Gulistan Tara û Hêro Behadîn ji aliyê dewleta Tirk re kir. Em tekez dikin ku em ê li ser rê û şopa wan berdewam bikin.”
RÊXISTINA RONUS: EM QETILKIRINA ROJNAMEGERAN ŞERMEZAR DIKIN
Rêxistina Ronusê jî bi daxuyaniyekê qetilkirina rojnamegeran şermezar kir. Daxuyanî li Navenda Metro ya Silêmaniyeyê hate dayin. Li ser navê Rêxistina Ronusê Hawkar Îzet axivî. Îzet, destnîşan kir ku dewleta Tirk li sînorê Kobanê yê rojavayê Kurdistanê du rojnamevan qetil kir, bi hemwextî wê gelek caran başûrê Kurdistanê jî bombebaran kir. Îzet, wiha domand: “Êrişên dewleta Tirk ên li ser rojnamevanan dewam dikin, herî dawî dewleta Tirk du rojnamevanên diyar Cîhan û Nazim şehîd xist. Şehîd xistina rojnamevanan carek din îspat kir ku Tirkiye dev ji sûcên xwe yên ser medya û ragihandinê bernedaye. Em vê êrişê bi tundî şermezar dikin, Tirkiye bi van êrişan dixwaze dengê azad bêdeng bike.”