Rojnamevan Nazım Daştan û Cîhan Bîlgîn ku geşedanên li Bakur û Rojhilatê Sûriyeyê dişopandin, 18’ê Kanûnê saet di 15.20’an de li ser rêya di navbera Bendava Tişrîn û bajarokê Sirînê de ji aliyê pêgerên hewayî yên bêmirov ve hatin hedefgirtin û qetilkirin. Ajokarê wesayîta rojnamevanan Ezîz Hec Bozan ji birîndar bû. Nazim Daştan û Cîhan Bîlgîn ji 8'ê Kanûnê ve geşedanên li Bendava Tişrîn û Pira Qerekozak dişopandin.

 

Bertekên li hemberî qetilkirina rojnamevanan ji aliyê saziyên pîşeyî û bi taybet çapemeniya kurd ve dewam dikin. Serokê Sendîkaya Kedkarên Çapemenî, Ragihandin û Poste (Haber-Sen) Mesut Balcan û Serokê Sendîkaya Xebatkarên Çapemenî û Weşanê ya Tirkiyeyê (DÎSK Basîn Îş) Turgut Dedeoglû têkildarî êrişên li ser rojnamevanan axivîn.

 

‘ROJNAMEVANÊN MUXALIF JI BO REJÎMAN TEHDÎD IN'

 

 

Serokê DÎSK Basin Îşê Turgut Dedeoglû diyar kir ku êrişên rejîma otorîter û desthilatên çewisîner li dijî rojnamevanan binpêkirina herî mezin a mafên mirovan e û got: "Armanca êrişan bêdengkirina dengên muxalefetê ye." Dedeoglû anî ziman ku bi vî rengî hewl tê dayin ku civak bê kontrolkirin û wiha got: “Armanckirina rojnamevanan ku li ser gendelî, binpêkirinên mafên mirovan an jî xeletiyên siyasî radigihînin û kuştina rojnamevanên bi nêrînên dijber armanc dike ku pêşî li nûçeyên li qada navneteweyî îmajeke xirab çêdikin bê girtin bi xwe ye. Bêdengkirina rojnamevanan xetereyeke cidî ye li ser azadiya çapemeniyê li seranserê cîhanê û nîşana lawazbûna nirxên demokratîk e."

 

‘SÛCÊ LI DIJÎ MIROVAHIYÊ YE'

 

Dedeoglû diyar kir ku qanûn û mekanîzmayên navneteweyî yên ku rojnamevanan diparêzin armanca wan garantîkirina azadiya çapemeniyê, piştgirîkirina azadiya ramanê û pêşîgirtina li tundiya li dijî rojnamevanan e û got: "Lê belê em dibînin ku qanûnên navneteweyî jî nikarin rojnameanan ku peywira xwe dikin biparêzin. Me di 19'ê Kanûna 2024'an de mînaka vê yekê dît. Xebatkarên Çapemeniya Azad Nazim Daştan û Cîhan Bîlgîn ku geşedanên li Bakur û Rojhilatê Sûriyeyê dişopandin, hatin qetilkirin. Ajokarê wesayîtê Ezîz Hec Bozan jî birîndar bû. Ev sûcê li dijî mirovahiyê ye. Ji bo sûcên li dijî mirovahiyê tu şert û mercên sînordarkirinê nîn e. Yên berpirsyar rojekê dê hesab bidin. Em rojnamevan, em ê her tim van sûc û sûcdaran bişopînin."

 

ARMANC BÊDENGKIRINA RASTIYAN E

 

 

Serokê Haber-Senê Mesût Balcan jî diyar kir ku qetilkirina rojnamevanan sûcê şer e. Balcan bal kişand ku rojnamevan ji ber ku rastiyê ji raya giştî re radigihînin hedef tên girtin û got: “Sîstema kapîtalîst ji bo ku zilma ku dike negihêje civakê, pir hewl dide. Di rastiyê de di qadên şer de hêzên hegemonîk û mêtinger rojnamevanan dikin hedefa yekemîn. Di vê heyamê de ku dezenformasyon di lûtkeyê de ye, erkên rojnamevanan pir girîng in. Di rastiyê de Nazim Daştan, Cîhan Bîlgîn û hevalên wan van erkan pêk dianîn.  Çapemeniya Azad bi binçavkirin, girtin û wekî îro jî bi kuştinê dike hedef. Em dikarin şerê rasteqîn niha wekî pevçûna hêzên modernîteya demokratîk û modernîteya kapîtalîst bibînin. Bi taybetî em dikarin wê wekî qada têkoşînê ya di navbera kesên ku li gorî modernîteya demokratîk xebatên çapemenî, weşan û ragihandinê dimeşînin û yên li gorî modernîteya kapîtalîst xebatên çapemenî, weşan û ragihandinê dimeşînin de bibînin." 

 

Balcan destnîşan kir ku bi kuştina rojnamevanan dê ser rastiyan neyê girtin û got ku wê tu kes nikaribe Çapemeniya Azad bêdeng bike. 

 

MA / Omer Îbrahîmoglû