Kesa bi navê Ayşegul A. tundî li zaroka bi navê P.K. kiribû û derheqê wê de bi sedemên “Sivik birîndarkirin” û “Dîmen û dengên têkildarî jiyana taybe teşhîr kiriye” doz hatibû vekirin. Danişîna duyemîn a dozê li 2’yemîn Dadgeha Cezayên Giştî ya Colemêrgê (dadgeha zarokan) hate lidarxistin. 

 

Ayşegul A. ku bi sîfetê “Zaroka neçarî sûc hatiye kirin” tê darizandin, di danişînê de amade bû. Mexdûr P.K. jî li bajarê lê dijiya bi rêya Pergala Deng û Dîmen (SEGBÎS) tev li danişînê bû. 

 

PARÊZER JI DANIŞÎNÊ HATIN DERXISTIN

 

Parlamentera DEM Partiyê ya Şirnexê Newroz Uysal Aslan, Navenda Mafên Jin û Zarokan a Baroya Colemêrgê, Şaxa Komeleya Hiqûqnasên ji bo Azadiyê (OHD) a Colemêrgê û gelek kes jî li edliyeyê bûn. Şandeya dadgehê bi hinceta ku Ayşegul A. zarok e, nehişt tu kes danişînê bişopîne. Parêzerên aliyan û xizmên wan di danişînê de amade bûn. 

 

Şandeya Dadgehê daxwaza mudaxilbûnê ya Navenda Mafên Jin û Zarokan a Baroya Colemêrgê red kir. Dadgehê, belgeya rayeyê ya parêzer Gulistan Karaduman û Azad Ozer qebûl nekir û biryar da ku ji eywanê bên derxistin. 

 

AYŞEGUL A. MEXDÛR HEDEF NÎŞAN DA

 

Danişîn, bi tespîtkirina nasnameyan dest pê kir. Ayşegul A., îdia kir ku sûcê wê nîne û dayika P.K.’ê ya bi navê N.K. hedef nîşan da. Li gel ku dîmen ji hêla wê bi xwe ve li ser medyaya dijîtal hatine parvekirin jî Ayşegul A.’yê hem N.K. hem jî rojnamegerên nûçe amade kirin bi gotina “endamên rêxistinê ne” hedef nîşan da. Ayşegul A.’yê îdia kir ku weke hedef hatiye nîşandan û got ku ew dayika P.K.’yê gilî dike. 

 

‘EZ Ê LI PEY DOZA ME BIM’

 

Piştre jî dayika P.K’yê N.K. axivî û wiha got: “Ez endama rêxistinê nînim û tu eleqeya min bi rêxistinekê re nîne. Vîdeo, ji hêla Ayşegulê bi xwe ve hatin parvekirin. Ya ku ev dîmen belavkirî ew bi xwe bû. Li ser vê yekê rojnamegeran xwe gihandin min û min jî rastî pê re parve kirin. Serê min bilind e û qet poşman nînim. Ez ê heta dawiyê li pey doza keça xwe bim.” 

 

Şandeya dadgehê piştî parastinan, ji bo temamkirina xisûsên kêm doz taloqî 12’ê adara 2025’an kir. 

 

NEWROZ UYSAL: ÇIMA BÊDENG DIMÎNIN?

 

Piştî danişînê li pêşiya edliyeyê daxuyanî hate dayin. Parlamenter Newroz Uysal Aslan wiha got: “Ev danişîn baş nîşan dide bê ka bi polîtîkayên şerê taybet ciwan xistine çi halî. Ji roja ewil ve ye em di çarçoveya pirsa ‘li Colemêrgê çi diqewime?’ xebatan dikin. Ev polîtîkaye ciwan û jinan ber bi ku de dibin? Guhên xwe ji tiştên li vir diqewimin girtin. Çima bêdeng dimînin? Di vê danişînê de careke din em bûn şahidê durûtiya îktîdarê. Parêzer tev li hemû danişînan dibin lê nehiştin tev li vê bibin. Ev doz ne dozeke jirêzê ye. Gelê kurd dizane ku li vir destekî qirêjî heye. Em banga ronîkirina tiştên diqewimin dikin. Em ê vê dozê bişopînin. Em ê gel û ciwanên xwe li dijî van polîtîkayên şerê taybet biparêzin.” 

 

TÊKILDARÎ AYŞEGUL A.’YÊ DE

 

Ayşegul A., bi belavkirina fihûş û tiryakê ya li Colemêrgê bûbû rojev. Nûçegihana JINNEWS’ê Rabîa Onver ku nûçeya mijarê çêkiribû weke hedef hate nîşandan û bi îdiaya “Agahiyên xelet parve dike” îfadeyê wê hatibû girtin.