NAVENDA NÛÇEYAN – Namzetên HDP’ê yên Amedê pişt gund bi gund geriyan tev li xwarina fitarê bûn. Aktîvîstên T JA’yê jî di sofreya ser rûyê erdê de hatin gel hev. Li Sêrt, Çewlik û Meletiyê jî ji gundewaran heta bajaran xebatê birêve dibin.
Tevgera Jinên Azad (TJA) di çarçoveya xebatên hilbijartina 24’ê Hezîranê de bi beşdariya namzetên HDP’ê yên Amedê Remziye Tosun, Dersim Dag û Semra Guzel jî li navçeyên Sûr, Yenîşehîr û Peyasê sofreya ser rûyê erdê li dar xistin. Gelek jinên taxan tev lî bûn. Piştî fitarê jinan stran gotin û govend gerandin û pişt re jî mal bi mal geriyan û belavokên HDP’ê belav kirin.
PASÛR
Namzetê HDP’ê yê Amedê Abdurrahîm Durmuş ê ciwan jî li bi rêveberên partiya xwe re çû navçeya Pasûra Amedê û serdana gundan kir. Durmuş herêma Kawar a li Pasûrê bi gundiyan re hat gel hev û gundiyan ew bi dilgermî pêşwazî kir. Durmuş belavokan da welatiyan û behsa HDP’ê kir. Welatiyan jî got ku partiya desthilatdariyê xizmetê nabe gundên wan û ji ber vê yekê dê dengê xwe bidin HDP.
BISMIL
Rêxistina HDP’a Bismilê jî bi beşdariya Namzetên HDP’ê yên Amedê Îmam Taşçier û Musa Farisogullari xwarinê fitarê da. Xwarin li Salona Dawetê ya Zal pêk hat û bi hezaran welatî tev li bûn. Gelek malbatên kesên di dîrokên cuda de jiyana xwe ji dest dan jî tev li fitarê bûn.
Di bernameyê de ewil Îmam Taşçier axivî û behsa polîtîkayên AKP’ê yên bihakirina ji mazotê bigire heta zexîreyan kir û got ku êdî dema rawestandina polîtîkayê AKP’ê hatiye.
‘GEL AZADIYA OCALAN DIXWAZE’
Namzet Musa Farisogullari jî axivî û got: “Biryara gel ji bo 24’ê Hezîranê zelal e. Li aliyekî şer li ser kurdan kûr kir û li aliyêkî jî tecrîda giran danî ser Rêberê Gelê Kurd Abdullah Ocalan. Gelê me dixwaze ku demildest tecrîd bê rakirin. Êdî dema azadiya Ocalan hatiye. Em ê ji bo vê biryardariya gelê xwe têkoşîna xwe dewam bikin.”
ERXENÎ
Namzet Ferda Fahrîoglu Akin jî li navçeya Erxeniyê buroya hilbijartinê vekir û civîna gel li dar xist û xîtabî welatiya kir û da zanîn ku derd û kulê AKP’ê ne HDP û PKK ye gelê kurd e û ew ê jî li dijî vê di 24’ê Hezîranê de mohrê li yekîtiya xwe bixin.
SÊRT
Namzetên HDP’ê yên Sêrtê jî çûn gundên ku di salên 90’an de hilweşandin û şewitandin û welatiyan ziyaret kirin. HDP’yan li gundên Kelendera, Kelehok, Gereuşe, Konutên Mervan Gul, Derxalip, Dodois, Lefê, Gundêşêx, Nivila, Xêrtê, Sedax, Xelîla, Terham, Merxê, Şidada û Tirim geriyan û malbat ziyaret kirin. HDP’î li hemû gundan bi kelecanek mezin hatin pêşwazîkirin.
‘DENGEK JÎ DENGEK E’
Namzet piştî gera gundan derbasî navenda Sêrtê bûn û li taxa Congbayirê tev li şahiyê bûn. Namzet Hayrettîn Şen xwest ku welatî kaxizê xwe yê hilbijêr ji keyatiyan bistînin û wê dengek jî wan bibe serkeftinê.
ÇEWLIG
Rêxistina HDP’ê ya navçeya Dara Hênê jî bernameya xwarina fitarê li dar xist. Namzetên HDP’ê yên Çewlikê Erdal Aydemîr, Nîhat Aksoy û Şefîka Dogan û gelek kes beşdar bûn. Namzetan axaftin kir û destnîşan kirin ku hilbijartina 24’ê Hezîranê ji bo her kesî mîladek nû ye û xwestin gelê Çewligê di vê çarçoveyê de berpirsyariyê bigire ser milê xwe.
MELETÎ
Hevserokê Giştî yê HDP’ê Sezaî Temellî dema duh derbasî Xarpêtê dibû, ji aliyê namzetên HDP’ê yên Meletiyê, rêveberên partiyê û gelek welatiyan ve li ser rê hat pêşwazîkirin. Piştî tûra lî navenda Meletîyê Temellî oxirî Xarpêtê kirin.
Piştî vê pêşwazîkirinê namzetên HDP’ê yên Meletiyê derketin ziyareta esnafan û derî bi derî geriyan û silav dan gel. Namzet Yusuf Bozkuş, Jiyan Taş û Hevseroka HDP’a Meletiyê Perîhan Yucekaya û rêveberên HDP’ê kafeteryayên li ser kolanên Nasuhî û Mucellî yên li navçeya Battalgaziyê ziyaret kirin. Namzetan bi esnafan re sohbet kir.