MÊRDÎN – Namzeta HDP'ê ya Mêrdînê Pero Dundar ku nêzî 20 salan di girtîgehê de ma, diyar kir ku ew ê di Meclîsê de jî bibe dengê jinan û got: "Em bi dengekî dikarin faşîzmê bifetisînin."
Namzeta HDP'ê ya Mêrdînê Pero Dundar ku heta niha gelek caran hatiye binçavkirin, girtin û nêzî 20 salan di girtîgehê de maye, li Nisêbîna Mêrdînê hatiye dinê û 43 salî ye. Dundar, di 15 saliya xwe de hatiye girtin û di dema "operasyonên KCK"ê de ku li hemberî siyasetmedarên kurd pêk hat dîsa hat girtin.
‘EM WEKÎ ÎTIFAQA GELAN DI HILBIJARTINÊ DE CIH DIGIRIN'
Dindar, anî ziman ku ew namzeta bajarekî xwedî bawerî û nasnameyên cuda ye. Dundar bal kişand ser zehemtiyên pêvajoya hilbijartinê ku di pêvajoyeke Rewşa Awarte de pêk tê û bilêv kir ku partiya wan ji bo gelan alternatîfek e. Dundar got: "Li hemberî îtifaqa faşîst em wekî îtifaqa gel di hilbijartinê de cih digirin."
‘EM Ê BIBIN DENG Û TÊKOŞÎNA JINAN'
Dundar got "Wan bi ciwanî dest bi têkoşînê kir û ew ê bi ciwanî biqedînin". Dundar, destnîşan kir ku guherîna li welat bi jin û ciwanan pêkan e. Dundar bi lêv kir ku êdî divê siyaset ciwan bibe û got: "Em ê deng û têkoşîna jinên ku ji aliyê pergala nêrza ve tên çewisandin û zirar û şidetê dibînin."
‘EM Ê DRAMA LI NISÊBÎNÊ VEGUHÊZÎNIN MECLÎSÊ'
Dundar, diyar kir ku ew ê drama ku di dema "qedexeya derketina kolanan" a li Nisêbînê rû da jî veguhêzînin Meclîsê û got: "Gelê kurd got 'ez ê xwe û bajarê xwe tev de bi rê ve bibim.' Lê belê ev daxwaza wan nehat naskirin. li şûna wê bajar hatin rûxandin û talankirin. Li Mêrdînê cihê ku zêde bedêl daye Nisêbîn e. Loma li meclîsê ewil ez ê vê yekê bişopînim."
Dundar, bal kişand ser tecrîda li ser Rêberê PKK'ê Abdullah Ocalan û got: "Tirkiye û Rojhilata Navîn di şexê Ocalan de di bin tecrîdeke giran de ye." Dundar, bilêv kir ku ev tecrîd zirarê dide gelan û ji bo dawî li vê tecrîdê bê divê herkes dengê xwe bi kar bîne. Dundar, bi bîr xist ku bi deklerasoya ku Ocalan daxuyand, welat 3 salan bêhn stend û got: "Di 24'ê Hezîranê de bi dengekî her tişt dikare biguhere. Em bi dengekî dikarin faşîzmê bifetisînin. Bi dengekî di serî de birêz Ocalan, Selahattin Demirtaş û hemû hevrêyên me dikarin azad bibin û em dikarin Tirkiyeyê veguherînin qada jiyanê."
MA / Berzan Guneş