Partiya Demokratîk a Gelan (HDP) a Êlihê der barê xebatên hilbijartinê de li avahiya xwe civîna çapemeniyê li dar xist. Namzetên HDP’ê yên Êlihê Feleknas Uca, Ayşe Acar Başaran, Necdet Îpekyuz, Mehmet Ruştu Tiryakî û Şukru Baytar, Hevseroka HDP’ê ya Êlihê Bêrîvan Helen Işik, Hevserokê DBP’a Êlihê Şukru Baytar û Dayikên Aştiyê tev li civînê bûn. 

 

'NE EM GEL DIBÊJE’ 

 

Di civînê de Ayşe Acar Başaran axivî û çapemeniya li Elihê ya ku ji 20 saziyan zêdetir e û tev li daxuyaniya wan nebûye rexne kir û got ku tenê ji bilî du sê saziyên çapemeniyê kes xebatên wan naşopîne. Başaran di berdewama axaftina xwe de wiha got: “Li Êlihê partiya detilatdar HDP ye. Ji sedî 70’ê dengan digire. Tune hesibandina vîna gel me xemgîn dike. Di 4’ê Hezîranê de em ê li Uçyola Zîlan a Hezoyê Hevserokê xwe giştî Sezaî Temel bi coşek mezin pêşwazî bikin. Çunkî em bi rojane xebata vê yekê dikin. Em diçin kîjan malê gel ji me re dibêje ‘em ê AKP bikin partiya tabelayê.’ Viya ne em gelê me dibêje.” 

 

Hevseroka HDP’ê ya Êlihê Berîvan Helen Işik jî der barê bernameya 4’ê Hezîranê de agahî dan û got: “Em ê di 4’ê mehê de saet di 16.00’an de li Uçyola Zîlan a Hezoyê Hevserokê xwe Sezaî Temellî pêşwazî bikin. Çawa me namzetên xwe bi heybet pêşwazî kir em ê hevserokê xwe giştî jî pêşwazî bikin. Piştî pêşwaziyê saet di 21.00’an de li buroya navendî dê hevserokê me xîtabî gel bike. Ji niha ve em ji gelê xwe re spas dikin.” 

 

AMED

 

Li Amedê jî xebatên hilbijartinê didomin. Namzetê HDP’ê yê Amedê Musa Farisogullari tevî heyeta pê re di çarçoveya xebatên hilbijartinê de li kolana Melîk Ahmet a navçeya Sûrê esnafan ziyaret kir. Farisogullari û yên pê re ji aliyê esanafan ve bi eleqeyek mezin hatin pêşwazîkirin û li gel esnafan sohbet kirin. Farisogullari li daxwaz û gazinên esnafan guhdar kir. 

 

‘GELÊ SÛRÊ DIZANE WÊ DENGÊ XWE BIDE KÎ’ 

 

Farisogullari di ziyaretê de axivî û destnîşan kir ku tengezariya esnafan a aboriyê dê hemû bi hev re çareser bikin û got: “Em ji gelê xwe bi bawer in, wê dîktatoriyê têk bibin. Em xizmetkarê gelê xwe ne. Wekîlitiya gel jî viya dixwaze. Dema berê gelek partî hatin û ji vî gelî re axatiyê kirin. Em ê wek HDP’ê di çarçoveya daxwaz û hêviyên gel de tevger bikin. Gelê Sûrê dizane ku wê dengê xwe bide kî.”