COLEMÊRG - Li Geverê, Şiyar Mazlûm Sevmezê 10 salî ku pere ji dayik, bav û xizmên xwe berhev kirin, birin bankeyê û li ser hesabê namzetê serkomariyê yê HDP'ê Selahattin Demirtaş razand.
Li navçeya Geverê ya Colemêrgê, zarokê 10 salî Şiyar Mazlûm Sevmez, pereyên ku ji xizmên xwe kom kirin birin bankeyê û razand hesabê namzetê serokomariyê yê HDP'ê Selahattin Demirtaş ku di Girtîgeha Tîpa F a Edîrneyê de ye.
PEREYÊ KU KOM KIRIN RAZAND HESABÊ DEMÎRTAŞ
Şiyar Mazlûm Sevmezê 10 salî ku dema Demirtaş hat girtin name jê re şand, piştî ku Demirtaş bû namzet qumbereya xwe hilgirt û ji bo piştevaniya xebatên hilbijartinê bike pere kom kirin. Sevmez xercaneya xwe ya dibistanê, pereyên ku ji xizmên xwe yên li gundê Şakitanê û dê û bavên xwe kom kirin, tevî bavê xwe çû bankeyê û li ser hesabê Demirtaş razand.
Şiyar, diyar kir ku Demirtaş tenê ji bo wî, ji bo hemû zarokan têdikoşe û loma ew jê hez dikin. Sevmez, anî ziman ku Demirtaş bi awayekî enheqî hatiye girtin û got: "Em piştevaniya kampanyaya hilbijartinê ya Demirtaş bikin." Şiyar behsa nameya ku Demirtaş jê re şandiye jî kir û got, dema Demîrtaş ji girtîgehê derkeve ew ê serdana wî bike.
DEMÎRTAŞ: HER TIŞT JI BO AZADIYA ZAROKAN
Demirtaş di nameya ku ji Şiyar re şand wiha gotibû:
"Mazlûm maç dikim û hemêz dikim. Dema derketim û qismet be teqez em ê hevdu bibînin. Ji bo wêne, resm û namzeyê Mazlûm pîroz dikim. Her tişt ji bo pêşeroja azad a zarokên me ye. Silav ji bo gundê Şakitan û Gevera leheng. Bi hêviya hevdîtinê."
Şiyar jî di nameya xwe ya ji Demirtaş re şandibû gotibû: "Merheba Selocan Başqan. Ji ber ku te xistin girtîgehê pir xemgîn bûm. Ji bo te ji wir derxînim, çi ji destê min bê ez ê bikim. Ez ê te ji wî zilamê xerab ê te xistiye girtîgehê xelas bikim. Ji bo te careke din bibînim, pir bê sebr im. Ev zilamên xerab bavê min jî xistin girtîgehê. Tu ji zarokan hez dikî û wan diparêzî. Em jî pir ji te hez dikin."
MA / Fethi Balaman