Dayikên Şemiyê di hefteya 655’an de bi dirûşmeya “Faîl diyar in, winda li ku ne" li Qada Galatasaraye kom bûn çalakiya xwe ya heftane berdewam kirin. Dayikan di çalakiyê de pankarta "Faîl diyar in, winda li ku ne" vekir û wêneyên ku qurnefil û şarikên sipî yên senbola aştiyê li ser e vekirin. Di çalakiyê de Parlamentera HDP'ê Pervin Buldan, Dayika Berkin Elvan Gulsum Elvan, Parlamenterê CHP'ê Sezgin Tanrıkulu û gelek kesên din amade bûn. Dayikan vê hefteyê çîroka Fehmî Tosun ê 35 salî û Huseyîn Aydemîr ê 34 salî yên di 19'ê Cotmeha 1995’an de hatin revandin û windakirin vegotin. Parlamenterê CHP'ê Sezgin Tanrikulu, bal kişand ser doza Şemzînan û Lîceyê û wiha got: "Ev îktîdar xwediyê dewleta kûr yê nû ye. Em dê komkujiyên li Roboskî û qadên din her dem zindî di hişan de bihêlin.

 

‘BERÊ TOROSÊN SPÎ NIHA SÎHA HENE'

 

Serokwekîla Koma HDP'ê Pervin Buldan jî diyar kir ku 22 salin li Qada Galatasarayê aqûbeta windayan dipirsin û wiha got: "Hişmendiya Fehmi Tosun û kesên din winda kirin, îro hebûna xwe aşkere diparêze. 22 salin em li gel Hanım Tosun li vê qadê li windayan dipirsin. Me aqûbeta Fehmî, Hasan Ocak pirsî, lê me encam negirt. Fehmî bi Torosa spî hat revandin û qetilkirin. Niha SİHA ketin meriyetê. niha li Kurdistanê SİHA mirovan qetil dikin. Hişmendî nehat guhertin. Berê Torosan îro SÎHA mirovan qetil dike. Em dê her dem hesab bipirsin û heta em encam bistînin emê têbikoşin."

 

‘ME JI BÎR NEKIR EM JI BÎR NAKIN'

 

Hevsera Fehmî Tasun ê di 19'ê Cotmeha 1995’an de hat revandin û windakirin, Hanim Tosun jî anî ziman ku 22 salin çîroka hevserê xwe dibêje û wiha got: “Huseyin Aydemir û Fehmi Tosun ne mirovên ji rêzê bûn. Siyaset heqe, lê mafê wan ê înfaza bê daraz  tune ye. Em li pişt mafê hemû kesen hatin windakirin in. Heta ku kujer derkevin pêş darazê û bên cezakirin em dê têkoşîna xwe û lêgerina xwe berdewam bikin. Heta em kujerên we ronî bikin em we ji bîr nakin em dê we nedin ji bîr kirin." 

 

Piştre nameya keça Huseyin Aydemir Dilan Aydemir a ji Amedê şandiye hat xwendin. Aydemir, wiha got: "Em li Amedê û zarokên mamê min Fehmî dê li Stenbolê wêneyên bavên xwe bilind bikin. Em bi hevre wî ji bîr nakin." Kurê Abdullah Canan Tayip Canan  jî xwest dewlet arşiv û qeydan veke û kujeran darizîne. 

 

‘DÊ BIN BIKUJIN' 

 

Li ser navê dayikan Dayika Şemiyê Sebla Arcan daxuyanî da û wiha got: "Hikûmeta AKP'ê di qada navneteweyî de winda qebûl kirin. Gotin ji bo em dosyaya Fehmi Tosun û Huseyin Aydemir ji nûve vekin em hatin cem hev. Tosun û Aydemir ji Lîceya Amedê bûn. Bavê zarokan bûn. Ji ber zextan neçar man Lîcê terk bikin û bên Stenbolê. Tosun û Aydemir di 19'ê Cotmeha 1995’an de di saetên êvarî de ji aliyê polisên sivîl û bi çek ve bi torosa spî ya plaka 34 UD 597 hatin binçavkirin. Dema polîsan bi Torosê ew li ber malê binçav kirin, kir qêrîn û ji zarok û hevserên xwe re got ‘Ez hatim binçavkirin. Dê min bikujin' Cîran jî bûn şahidê bûyerê. Piştî Tosun hat binçavkirin hevsera wî çû qereqolê û bûyer vegot. Pkakeya maşînê da qereqolê. Malbata Tosun û Aydemir  serî li hemû rêyên zagonî û hiqûqî dan û serî li hemû saziyên dewletê dan. Lê hemû saziyên dewletê ev yek înak kir. Malbata Tosun doz birin DMME'ê. Doz li DMME'ê bi encam bû. Hikûmetê parastin da DMME'ê û got "Em xemgîn in. Piştî vê yekê der barê Tosun û Aydemir de lêpirsînek çalak nehat kirin. 

 

HIKÛMETA AKP'Ê BERPIRSIYAR E

 

Arcan, herî dawî anî ziman ku ji ne ronîkirina Tosun û Aydemir AKP berpirsiyare û wiha bi dawî kir: "Midûrê Polîsan ê berê Necdet Menzir, Waliyê Stenbolê yê berê Hayri Kozakçioglu, Midurê TEM'ê yê Stenbolê yê berê Reşat Altay, Cîgirê Midûrê Şaxa TEM'ê yê Stenbolê Kadir Akbıyık, Midûrê Giştî yê Polîsan Mehmet Agar, Nahit Menteşe, Serokwezîra berê Tansu Çiller û Serokomarê berê Suleyman Demirel berpirsiyar in AKP ku di qada navneteweyî ya cîhanê de windakirina Fehmi Tosun qebûl dike û lê îro berpirsiyariya xwe pêk nine AKP berpirsiyarê vê yekê ye."