STENBOL - Endama Dayikên Şemiyê û Hevsera Huseyin Taşkaya ê hat windakirin Sultan Taşkaya ku her şemî tev li çalakiyên şemiyê dibe û aqubeta windayan dipirse, diyar kir ku 25 salin li benda xeberekê ye û wiha got: “Her ku her roj kujer li pêş çavên me digerin em her roj dimirin. Em her Şemî dibêjin Bila zarokên din bê bav mezin nebin û em edaletê dixwazin." 

 

Di salên 90’î de li bajarên kurdan û metrepolan bi hezaran ciwanên kurd hatin binçavkirin û di bin çavan de hatin windakirin. Bi hezaran gund hatin şewitandin. Bi hezaran mirov hatin kuştin û zarokên bi sedan mirovan bê bav û bê dayik mezin bûn. Li Navçeya Sîweregê ya Rihayê jî di 6'ê Kanûna 1993'an de Huseyin Taşkaya  hat binçavkirin û piştre hat windakirin. 

 

Huseyîn Taşkaya di zivistana 93'an de li mala mamê xwe hat binçavkirin û piştre di bin çavan de hat windakirin. Hevsera Taşkaya Sultan Taşkaya 25 salin li hevserê xwe digere û 23 salin bê navber her şemî li Qada Galatasarayê çalakiya rûniştinê pêk tîne û li edaletê digere. Taşkaya, anî ziman ku her roj li benda xeberekê ne. Sultan Taşkaya, anî ziman ku dema hefteyekê neçin qada Galatasarayê gelek tişt ji xwe winda dikin û wiha got:  "Huseyîn Taşkaya 42 salî û bavê 4 zarokan bû. Li sîweregê mutahid bû. Hin kes hatin malê û gotin 'Navê te di lîsteya kuştinê de heye. Tu ji Riha biçe dê ji bo te baş be. Lê Huseyin Taşkaya jî diyar kir ku zerara wî negihiştiye tu kesî û ew ji Rihayê naçe. Taşkaya her çend nexwest ji Rihayê biçe û nexwest axa xwe terk bike jî herî dawî îkna bû û di sala 1993'an de koçî Stenbolê kir. Piştî çû Stenbol û dîsa ji bo karê xwe yê mayî temam bike vegeriya Sîweregê di roja 4'an de di 6'ê Kanûna 1993’an de saet di 13.00'an de leşker, polîs û cerdevanên girêdayi Eşîra Bucak bi karwana 30 maşineyî bi ser mala mamê Huseyin Taşkaya Mehmet Taşkaya de girtin. Huseyin Taşkaya li mala mamê wî binçav kirin û birin. Piştî Huseyîn Taşkaya hat binçavkirin, carek din agahî jê nehat girtin. 

 

SEDAT BUCAK: ME TESLÎMÎ DEWLETÊ KIR

 

Hevsera Huseyîn Taşkaya Sultan Taşkaya, wê demê li Stenbolê bû. Ji xizmê xwe fêr bû ku hevserê wê hatiye binçavkirin. Ewil nexwest zarokên xwe bi tenê bihêle û vegere Sîweregê. Dema Sultan bi telefonê li mala xizmên xwe yên Sîweregê geriya, dengê girînê û gotina 'Xalê min kuştine' bihîst. Taşkaya piştî vê yekê zarokên xwe dan tenişta xwe û vegeriyan Sîweregê. Taşkaya dema hat gund, ne xizmên wê û ne jî cîranê wê li gel wê ne axivîn. Her kes ditirsiya. Taşkaya, ji bo aqûbeta hevserê xwe fêr bibe çû Walîtî, Midûriyeta polîsan û Fermandariya Cendirmeyan. Lê tu agahî negirt. Her kesî digot ji Sercerdevan û Serokê Eşîra Bûcakan Sedat Bucak bipirsin. Sedat Bucak jî got "Ekîba me ew birin, lê teslîmî dewletê kir. Piştî vê yekê agahiya me jê tune ye. Dewlet dizane." 

 

Herî dawî rayedaran ji Sultan Taşkaya re got ‘Kurê xwe bibe û biçe. Hevserê te carek din nayê. Hemû serlêdanên malbatê bê encam man. Sultan Taşkaya, 25 salan bê navber li hevserê xwe geriya û çavê wê li rêya hevserê wê Huseyîn ma. 

 

'ZAROKÊN MIN TÎ, BIRÇÎ Û TAZÎ MAN' 

 

Taşkaya ku piştî encam bi dest nexist vegeriya Stenbolê diyar kir ku hemû mal û milkê wan li Sîweregê ma û wiha got: "Min li gel 4 zarokên xwe li dijî şert û mercên zor û zahmet ên Stenbolê li ber xwe da û têkoşiyam. Zarokên min biçûk bûn. Tî, birçî û tazî man. Em di xaniyên kirê de bûn. 

Gelek caran heqê rêya min tune bû. Zarokên min pêlav boyax kirin. Av firtoin. Derûniya wan xera bûn. Em pir giryan."  

 

’25 SALIN EM AGAHÎ NASTÎNIN

 

Taşkaya, da zanîn ku piştî hevserê wê hat binçavkirin êdî her dem xeberê televîzyonê demaşe kir û di  93'an windakirina hevserê wê di xeberên televîzyonê de jî derbas bûye û wiha berdewam kir: "25  salin hêj tu agahî tune ye. Ez her dem li benda xeberekê me. Maşineyek me ya spî hebû. Kengî ez maşîneyek spî dibînim ez li hundirê wê dinerim dibêjim dibe ku di hundê wê de be. Dema zarokên min dereng tê mal, ez ditirsim ku dereng bên mal. Heta ez hebim dê şopekek birînê di dilê min de be." 

 

JI XEYNÎ DAYIKÊN AŞTIYÊ KÎ MIN FAM DIKIN

 

Sultan Taşkaya ji sala 1995'an heta niha li Qada Galatasarayê li gel Dayikên Şemiyê li aqûbeta hevserê xwe dipirse. Taşkaya bal kişand ser çalakiya xwe û wiha got: "23 salin ez li gel zarokên xwe her şemî diçim Qadê. Hin caran heqê rê nabînim. Dema ez hefteyekê naçim wekî ku min gelek tişt winda kiribe. Ez li wir tesellî dibim. Ji bo min ji xeynî Qada Galatasaraye cihekî ku min teselî bike tune ye. Tenê dayik min fam dikin. Ji xeynî Dayikên Aştiyê kî min fam dike? Ez ji malbata xwe bêtir ji dayikên Şemiyê hez dikim. Ez diçim li wir teselî dibim. Bi dehan caran ez û kurê xwe hatin binçavkirin. Em rastî lêdanê hatin. Em seqet bûn. Gotin neyên çalakiyê çênekin. Destûr nedan. Lê tevî her tiştî em çûm qadê û me çalakiyên xwe bê navber berdewam kir. Ez niha neviyê xwe dibim. Min dest ji têkoşîna xwe berneda. Ezê dest ji têkoşîna xwe bernedim. Ez bimirim jî zarok û neviyên min dê biçin hesap bipirsin." 

 

‘BILA HESTIYÊN ME TESLÎM BIKIN'

 

Taşkaya, da zanîn ku ew hestiyên windayên xwe bibînin jî dê tesellî bibin û wiha berdewam kir: "Birayê Huseyin ê biçûk jiyana xwe ji dest da. Me şîna wî girt. Gora wî diyar e. Malbat her hefte diçin ser gora wî. Lê gora Huseyin tune. Em hestiyê wî dixwazin. Em qet ne rehet in. Heta ku em hestiyê wî bibînin em dê têkoşîna xwe û lêgerîna xwe berdewam bikin. Qatil her roj li bêş çavê me digerin. Her ku em wan dibînin em tên kuştin. Em dixwazin hestiyê me teslîm bikin. Li Tirkiye edalet tune ye. Ji ber ku em kurd bûn em hatin kuştin. Ez tevî vê êşê dîsa aştiyê dixwazim. Zarokên min bê bav man û mezin bûn. Em naxwazin zarokên din bê bav mezin bibin. Kurd, tirk ferq nake. Bila zarok bê bav mezin nebin." 

 

MA / Melîke Ceyhan