AMED – Hevserokê HDP’a Amedê Mehmet Şerîf Çamci destnîşan kir ku deklarasyona çareseriya pirsgirêka kurd xwedî girîngiyek mezin e û got: “AKP a ku behsa kurdan nake, êdî ji bo kurdan xelas bûye.”
Hevserokê Rêxistina Partiya Demokratîk a Gelan (HDP) a Amedê Mehmet Şerîf Çamci deklarasyona çareserkirina pirsgirêka kurd a ku HDP’ê li Amedê aşkere kiribû nirxand.
‘REWŞA DAWÎ LI BER ÇAVAN E’
Çamci destnîşan kir ku pirsgirêka bingehîn a li Tirkiyeyê neçareserkirina pirsgirêka kurd e û got: “Tu demê daxwaza statûyê ya kurdan nehatiye qebûlkirin. Kurd her tim bi nêzîkatiyên wiha re hevrû mane. Di serdema AKP’ê de viya baş xwe da xuyakirin. HDP tekane ku dikare pirsgirêka kurd çareser bike û partiyek li her nokteya Tirkiyeyê siyasetê bike. Heke pirsgirêkên bingehîn ên Tirkiyeyê neyên çareserkirin û tehlîla wan neyê kirin, dê Tirkiyeya 2018’an re rû bi rû bimîne û dê di vî halî de bimîne.”
'DI BINÊ HEMÛ PIRSGIRÊKAN DE PIRSGIRÊKA KURD HEYE’
Çamci hemû êrîşên di du salên dawî de li dijî kurdan bi bîr xist û ev tişt got: “Neçareskirina pirsgirêkê ji tecrîda li ser Rêberê PKK’ê birêz Abdullah Ocalan dest pê dike. Tu hewldanên birêz Ocalan hilnadin ber çavan û hemû qeyranên diqewimin ji vê yekê ye. Tecrîda li ser birêz Ocalan peyama herî girîng a ku dixwazin bidin gelê kurd e. Israrkirin û ne micidbûna neçarserkirina pirsgirêka kurd xwe dide der. Li dilê Kurdistanê li Amedê dilê însanan ji bo dê çareserî çawa pêk were lê dide. Me li Amedê deklarasyonek birfireh aşkere kir. Gelê me piştevaniyek xurt da deklarasyonê. Di bine hemû pirgirêkên welêt de pirsgirêka kurd heye.”
‘DIZ Û XWEDIYÊ MALÊ BI HEV HESIYAN E’
Çamci anî ziman ku êdî rastiya siyaseta AKP’ê birêve dibe pir aşkere bûye û wiha dewam kir: “Nêzîkatiya di çareserkirina pirsgirêka kurd de bi êrîşên Tirkiyeyê yên li dijî Efrîn û Kerkûkê her tiştî xwe baş da zelalkirin. Êdî tu bawerî û hezkirina AKP’ê di nav gelê kurd de nemaye. AKP bixwe jî dibîne. Gotina pêşiyan a kurdan ‘Diz û xwediyê malê bi hev hesiyan e’ rewşê baş rave dike. Tu encamek wan dê bi ser pirsgirêka kurd re xwe bigîhinê nema. Gelê kurd dê dersek mezin bide AKP’ê. Wê helwesta xwe di 24’ê Hezîranê de baş bide nîşandan. Êdî tu sozek AKP’ê ji bo kurdan nemaye. Di manîfestoya wan de gotinek ji bo pirsgirêka kurd nîne. Êdî AKP ji bo gelê kurd xelas bûye. Tenê bi aliyên rantxwir re lîsteyek çêkirin. Namzetê wan jî di nav civakê de nayên hezkirin. Dê li ser berjwendiyên aborî bi bazirganê siyasetê re xebatên xwe birêve bibin.”