NAVENDA NÛÇEYAN – Namzetên HDP’ê ji bo dest bi xebatên xwe bikin berê xwe dan herêmên xwe. Li Mêrsîn û Amedê namzet bi hezkirin û kelecanek mezin hatin pêşwazîkirin. Pêşwazîkirin û danasîn veguherî mitîngan. Li Hatayê jî namzet ewil çûn serdana gora kesên di çalakiyên Geziyê de jiyana xwe dest dane û bi vî awayî dest bi xebatên xwe kirin. 

 

Piştî ku Partiya Demokratîk a Gelan (HDP) namzetên xwe da nasîn, namzetên parlamenteriyê vedigerin herêmên xwe. Namzetên HDP’ê ji aliyê girseyên qelebalix ve tên pêşwazîkirin. Namzetan bi karwanê wesayîtan li nav bajar geriyan û balkêş bû ku ji aliyê gel ve bi germahî tên pêşwazîkirin û dîmenên provaya 24’ê Hezîranê derketin holê. Coş û hezkirinek mezin li hember namzetan serdest e. Merasîmên pêşwazîkirinê vediguhere atmosfera mitîngan. 

 

Namzetên HDP’ê li Mêrsînê bi girseyî li navçeya Akdenîzê hatin pêşwazîkirin. Şahiya danasîna namzetan li Parka Ozgur Çocuk a navçeya Akdenîzê pêk hat. Namzet bi def û zirnê û lîlandinê hatin pêşwazîkirin. Namzet li gel stranên kurdî danasîn û namzet yek bi yek derketin ser dikê û gel silav kirin. 

 

Hevserokê HDP’a Mêrsînê Murat Baykan destnîşan kir ku zêde dema wan nîne û got: “Di pêvajoya pêşiya me de hilbijartinên girîng hene. Em ê bi serkeftina van hilbijartinan aştî û demokrasiyê bînin welêt.” 

 

‘EM Ê BI ER BIKEVIN’ 

 

Namzetê HDP’ê yê Mêrsînê Atîlla Guney jî got: “Em ê tenê ne xebata hilbijartinan, di heman demê de em têkoşîna demokratîkbûna Tirkiyeyê birêve dibin. Em ê bi ser bikevin. Ji niha ve li gelê me pîroz be.” 

 

‘SILAV JI KARKERÊN SODA’YÊ RE’ 

 

Pişt re namzetê HDP’ê yê Mêrsînê Ridvan Turan jî axivî û wî jî wiha got: “Em çalakiya greva karkerên SODA yên li Edene û Mêrsînê li ber xwe didin silav dikin. Li gel ku em di bin siya OHAL’ê de diçin hilbijartinan jî dê gel û kedkar bi ser bikevin û dê di rêveberiya welêt de bibin xwedî gotin.”

 

Namzeta HDP’ê ya Mêrsînê Fatma Kurtulan jî da zanîn ku ew ê bi jin û ciwanan re mil bidin milê hev û dê dê têkoşîna serkeftinê birêve bibin û got: “Yên ku welat ji pêvajoya antî demokratîk rizgar bikin em in.” 

 

Piştî axaftinan şahî bi çepik û berzkirina sloganan bi dawî bû. 

 

HATAY 

 

Namzetên HDP’ê yên Hatayê Bariş Atay, Hulya Kavuk, Kerem Nalbant, Fatma Ozdemîr, Servet Kavukoglu, Kadriye Turhan, Yilmaz Bayram, Guluzar Işik Çay, Mîthat Mîrîoglu, Naîm Ozbek û Paraşîn Gumuş li herêma xwe dest bi xebatan kirin. Namzet li navenda Antakyayê ji aliyê rêveberên partiyê û gel ve hatin pêşwazîkirin. Pişt re Bariş Atay û namzetên din, xebatkarên hilbijartinan bi ziyaretkirina gora Abdullah Comert, Alî Îsmaîl Korkmaz û Ahmet Atakan yên di çalakiyên Parka Geziyê de jiyana xwe ji dest dan starta xebatan dan. 

 

Di serdana goran de malbatan jî li gel namzetên HDP’ê hebûn û piştevaniya wan kirin. 

 

Namzet li avahiya HDP’ê ya bajêr bi gel re hatin gel hev û danasîna wan kirin. Namzet pişt re xwe berdan kolanan û esnaf û gel ziyaret kirin.

 

AMED

 

Namzetên parlamenteriyê yên HDP’a Amedê jî dest bi xebatên hilbijartinê kirin. Namzet li Balafirgeha Amedê ji aliya bi hezaran kes ve hatin pêşwazîkirin û dûre bi konvoya wesayîtan li nava bajêr tur avêtin. Alîgirên Amedsporê bi alên xwe beşdarî konvoyê bûn, hemû welatiyên li kêleka rêyan nîşaneyên serkeftinê ji bo konvoyê nîşan dan. Pişt re namezet li ber avahiya Rêxistina HDP’a Amedê kom bûn û girseya gel û endam û rêveberên partiyê ku wan li ber avahiya HDP'ê bi berzkirina dirûşmeya “Amed bi we serbilind e” pêşwazî kirin. Parlamenterên HDP’ê yên Amedê Feleknas Uca, Sîbel Yigîtalp û Ziya Pîr bi namzetan re gel silav kirin. 

 

‘NAMZETÊN AMEDÊ DÊ BIBIN HEWARA DAYÎKAN’

 

Hevserokê HDP’a Amedê Mehmet Şerîf Camci, destpêkê axivî û wiha got: “Namzetên Amedê dê bibin hewara dayîkan. Heya 24’ê Hezîranê têkoşîn têkoşîn û têkoşîn.”

 

PÎR: EM Ê TIM BIXEBITIN

 

Wekîlê HDP’ê yê Amedê Ziya Pîr jî anî ziman ku ew ê tim bixebitin û dê desthilatdariyê di sindoqande veşêrin. 

 

UCA: GELÊ AMEDÊ DÊ DI 24’Ê HEZÎRANÊ DE DÎROKÊ BINIVÎSÎNE 

 

Uca jî, da dest nîşan kir ku berxwedana gelê kurd wan li ser piyan digire û wiha bilêv kir: “Serê me bi gelê Amedê bilinde. Em deyndarê gelê xwene. Ji bo azadiya  gelê xwe em ê bi hevre têbikoşin.”

 

Piştre namzetên parlamenteriya HDP’ê yên Amedê Adnan Selçuk Mizrakli, Salîha Aydenîz, Îmam Taşçier, Remziye Tosun, Hişyar Ozsoy,  Semra Guzel, Garo Paylan, Dersim Dag, Musa Farîsogullari,  Abdurrahman Durmuş, Mehmet Temîzyuz û Ferda Fahrîoglu jî yek bi yek derketin ser otobusê, gel silav kirin û axivîn. Namzetan peyamên hevpar dan û gotin: “Di 24’ê Hezîranê de em ê rastiya gelê kurd bi wan bidin nîşandan. Em 12 wekîl dê biçin Meclîsê. Jin jiyan azad.”

 

Piştî danasînê namzet bi gerseya gel re li ber stranan govend gerandin.