MÊRDÎN – Berdevka Komîsyona Hilbijartinê ya Jinan a Mêrdînê ya HDP'ê Aynur Erbay, diyar kir ku wan li Mêrdîn û hemû navçeyên Mêrdînê komîsyonên hilbijartinê yên jinan avakirine û dê di hilbijartinê de dawî li serdestiya îtifaqa AKP-MHP'ê bînin.
Rêxistina HDP'ê ya Mêrdînê, di çarçoveya xebatên hilbijartinê de, ewil li navçeya Qoserê buroya hilbijartinê ya jinan vekirin û lez dan xebatên xwe. Berdevka Komîsyona Hilbijartinê ya Jinan ya Mêrdînê Aynur Erbay, diyar kir ku wan bi coy û kelecanek mezin buro vekir û ew dê vê coş û kelecanê li ser sindoqan jî nîşan bidin. Erbay, anî ziman ku we dê heta hilbijartinê li kolanan bixebitin û jin xwedî hêzek mezin in.
LI MÊRDÎN Û HEMÛ NAVÇEYAN KOMÎSYON AVAKIRINE
Erbay, destnîşan kir ku wan li Mêrdîn û hemû navçeyên Mêrdînê komîsyonên jinan ava kirine û bi awayekî rêxistinî xebatên xwe yên hilbijartinê berdewam dikin. Erbay, anî ziman ku jinên li Mêrdîn û navçeyên Mêrdîn bedelên gelek mezin dane û ji bo li van bedel û destkeftiyên xwe xwedî derkevin bi kelecan û coşek mezin tev li xebatan dibin. Erbay, da zanîn ku ev kelecan û coşa wan li kolanan û di qadên xebatê de xwe nîşan dide û dê vê kelecanê li ser sindoqan jî nîşan bidin. Erbay, destnîşan kir ku ew dê hilbijartina 24'ê Hezîranê bi têkoşîn û xebatên jinan bi dest bixin û bi hevre Tirkiye demokratîk bikin. Erbay, herî dawî da zanîn ku jin dê li Mêrdînê îtîfaqa AKP-MHP'ê têk bibin û wiha bi dawî kir: "Jin dê dawî li îttifaka AKP-MHP'ê bînin û sîleyek mezin li wan bidin. Jin dê îtîfaqa AKP-MHP'ê rawestînin. Pergalên ku jinan qebûl nekin û nas nekin, jin jî wê pergalê nas nakin. Ger ku li qadekê jin tune be têkoşîn jî tune be. Têkoşîn bê jin nabe. Demokrasî û aştîe jî bêyi jinê pêk nayê. Ji milê me de AKP û MHP xelas bûye."