Parlamenterên HDP'ê yên êzidî, gundê Efşê yê Êzidiyan ê Nisêbînê ku qeyûmê mala şînê xera kir ziyaret kirin. Parlamentera HDP'ê ya Êzidî Feleknaz Uca û Parlamenterê HDP'ê yê êzidî Ali Atalan, li gel parlamenterê HDP'ê Mehmet Ali Aslan û gelek welatiyên suryanî û êzîdî bi girseyek mezin hatin gundê Efşê ziyaret kirin. Heyet bi girseyî hat pêşwazîkirin. Heyetê li pêş mala sersaxiyê daxuyanî dan çapemeniyê.

 

‘EM DÊ LI HER QADÊ HESABÊ VÊ YEKÊ BIPIRSIN'

 

Parlamenterê êzidî yê HDP’ê Ali Atalan, bertekên xwe anî ziman û wiha got: "Çawa li Afganistanê Taliban peykerê Buda xera kirin, Çawa ku DAİŞ'ê li Sûriye peykerên li Palmira xera kirin, heman hişmendî li vir jî mala şînê ya êzidiyan xera kir. Gelê li vir û mirovên li vir tu carî serî netewand û dê tu carî serî netewînin. Ez li vir bang li qeyûmê dikim. Te îro çawa vir rûxand dê di hilbijartinê de gel jî de ji wê koltixê daxe." 

 

KEYA: EM JI BÎR NAKIN

 

Keyayê Gund Omer Yumuşak jî bertek nîşanî rûxandinê da û wiha got: "Li welatê ku hiqûq lê hebe wisa nabe. Li welatê hiqûqê tenê mirovek nabe serdest. Em dê tu carî vê rewşê ji bîr nekin." 

 

‘EM DÊ JI NÛVE MALA ŞÎNÊ AVA BIKIN'

 

Parlamentera HDP'ê ya Êzidî Feleknaz Uca jî diyar kir ku dewleta her dem qala azadiyê dike azadiya gelê êzîdî nas nake û wiha got: "Dewletê her dem êzidiyên li vir wekî ‘X’ dît. Wekî kesên nayên nasîn û naskirin pênase kir. Hikûmeta AKP'ê bi vê yekê feraseta xwe ya azadiyê pir aşkere nîşanî me da. 

 

Mala şînê xera kir. Li vir heq, hiqûq û edalet li ku ye? Destê walî, qeymeqam û hikûmetê di vê yekê de çiye? Ev tenê mala şînê ye. Ne cihekî siyasetê ye. Li vir tiliya êzîdiyekî jî xwîn bibe berpirsiyar hekîmet û qeyûm e. Yên ku vê fermanê didin bila baş zanibin ku dê gel bersîvê bide wan. Gel dê li dijî vê ferasetê li ber xwe bidin û bersîvê bidin." 

 

CI BÛBÛ

 

Welatiyên êzîdi yên Gundê Efyê yê li Kontara Çiyayê Bagokê ye û girêdayî Navçeya Nisêbînê ye, di salên 1980’an de bi zorê ji gundê xwe hatibûn koçkirin û dîsa vegeriya bûn gundê xwe. Welatiyên Êzidî piştî vegeriyan gund, mala sersaxiyê ava kiribûn. Yekîneyên Şaredariya Bajarê Mezin a Mêrdînê ku qeyûm tayîn kirine mala sersaxiyê xera kirin. Di 18'ê Gulanê de yekîneyên Şaredariyê çûn gund û bi kepçeyan mala sersaxiyê ya Êzidiyan xera kirin. Welatiyan dîmenên xerakirinê qeyd kirin. Parlamenterê Partiya Demokratîk a Gelan (HDP) yê Mêrdînê Alî Atalan jî xerakirina mala şînê teyît kir.  Li Gundê Efşê yê ku ji 130 malan pêk tê û 500 welatiyên Êzidî lê dijîn, di salên 1980 -1990'an de ji cih û warên xwe bi zorê hatibûn koçkirin. Gelek walatiyên êzîdî koçî Ewropa kiribûn. Di salên borî de gelek dîsa vegeriya bûn gundê xwe û ji nûve li gund bi cih bûbûn. Sala par di meha îlonê de mala şînê ya du qat ava kiribûn. Welatiyêin ku nêzî 100 salin li vî gundî dijîn, piştî qeyûm tayînî şaredariyê hat kirin, yekîneyên Şaredariya Bajarê Mezin a ku berê di destê DBP'ê de bû û piştre qeyûm tayînî wê kirin, xera kirin. Welatiyan ji bo rûhsatê serî li Şaredariyê dabûn. Lê Şaredariyê bi hinceta “Tapoya wê tune em nikarin rûhsatê bidin, lê ji bo hûn xaniyên xwe yên berê ji nûve ava bikin pirsgirêk tune" û li ser vê yekê mala şînê hatibû avakirin. Dîsa li ser “gilî" yekîneyên şaredariyê di 7'ê Cotmehê de çûbûn gund û mala şînê mohr kiribûn.