STENBOL - Di doza “Akademiya KCK’ê” de ku rojnameger Haydar Ergul û 15 kes tên darizandin de li şahidên nepen hate guhdarîkirin.
Danişîna 22’yemîn a doza rojnameger Haydar Ergul, xebatkara Kovara Jineolojiyê Şeyma Kantarci û 15 endamên Partiya Demokratîk a Gelan (HDP) bi îdiaya “endamtiya rêxistinê” tê de tên darizandin, li 22’yemîn Dadgeha Cezayên Giran a Stenbolê hat lidarxistin. Doza behsa xeberê weke “Doza Akademiya KCK’ê” tê binavkirin. Kantarci ji Girtîgeha Jinan a bi Tîpa L ya Alanya ya Antalyayê bi rêya SEGBÎS’ê tev li danişînê bû. Her wiha parêzer jî di danişînê de amade bûn.
Di danişînê de li şahidê nepen “Ulaş” hate guhdarîkirin ku derheqê Kantarci de îfade dabû. Şahidê nepen Ulaş, ji Edliyeya Enqereyê bi rêya SEGBÎS’ê tev li danişînê bû. Şahid, îdia kir ku Şeyma Kantarci di navbera salên 2012-2013’an de weke “Berdevka Jinan a Tirkiyeyê ya Tevgera Jinên Azad a Demokratîk (DOKH)” xebat meşandine. Her wiha şahidê nepen ji bo geştên Kantarci yên li derveyî welat û xebatên wê yên di mijarên mafên jinan de jî îdiaya “fealiyetên rêxistinê” kir.
Dozger, mutalaaya xwe ya bi daxwaza cezakirinê dîsa dubare kir. Danişîna dozê taloqî 13’ê hezîranê hate kirin.