Yek ji bajarên ku HDP bi awayekî zêde deng jê digire Wan e. Di hilbijartina 7’ê Hezîranê de li Wanê HDP’ê ji dengan ji sedî 75 girtibûn û 7 parlementer şandibûn meclîsê û di hilbijartina 1’ê Mijdarê de jî ji sedî 65.5 deng girtibûn û 6 parlementer şandibûn meclîsê. Di çarçoveya xebatên hilbijartin 24’ê Hezîranê de dê HDP’a Wanê bi awayekî çalak li gund û taxan dest bi xebatên xwe yên hilbijarinê bike. 

 

‘DIVÊ BERSIV BÊ DAYÎN’ 

 

Îlhan Ûyar diyar kir ku li herêmê betalî û xizanî zêde ye û got: “Hemû sînor hatin girtin. Mirovên me yên li nêzî sînor ji ber birçîbûnê koç kirin. Li bajêr herkes betal e û li qehwexane û parkan digerin. Em ji bo gelê xwe doza azadiyê dikin. Em ji bo hemû mirovan doza aştî û biratiyê dikin. Di hilbijartina pêş me de înşeleh dê mirov destên xwe deynin ser wijdanê xwe û dengê xwe bi kar bînin. Kesên doza demokrasiyê dikin divê destê xwe deynin ser wijdanê xwe. Divê bersiva vê zilmê bê dayîn.” 

 

‘DENGÊ ME JI HDP’Ê RE YE’ 

 

Zeynep Durmuş jî got: “Em kurd in em ê dengê xwe bidin xwe. Em gelê xwe nas dikin, em kesekî din nas nakin. Ma em ê çawa dengê xwe bidin Tayyip Erdogan? Ma Tayyip Erdogan ji bo me çi kiriye ku em dengê xwe bidin wî. Ji bilî hêstirên çavan tiştek nedaye. Em ê dengê xwe bidin xwe û înşelleh em ê bi ser bikevin.” Ayşe Yilmaz jî destnîşan kir ku ew ê roja hilbijartinê biçin ser sindoqan û dengê xwe bidin HDP’a ku jinan diparêze. 

 

‘BÊWESTAN DIVÊ EM BIXEBITIN’ 

 

Seyfettin Bor jî bal kişand ser îtifaqa AKP-MHP’ê û got: “Ew îtifaq nabe dostê me. Ez ê di tûra ewil jî û ya dudoyan de jî dengê xwe bidim HDP’ê. Înşelleh em ê vê carê ji her carî bêtir bi ser bikevin. Ji niha ve divê em heta hilbijartinê bêwestan bixebitin.” 

 

‘EZ Ê DENGÊ XWE BIDIM PARTIYA ME’ 

 

Zeynel Abidin Arikele jî bal kişand ser yekîtiya netewî ya kurdan û got: “Dema kurd dest bidin destê hevdu bêyî îtifaqan jî dê bi ser bikevin.” Arîkele destnîşan kir  ku di wijdanê mirovan de HDP heye û ew ê dengê xwe bidin partiya xwe. Asli Şengul jî, bi lêv kir ku ew ê dengê xwe bidin HDP’ya ku namzetê wê Selahattin Demirtaş e. Şengul diyar kir ku ji bo xwîn raweste, ji bo pêşeroja zarokên wan ew ê dengê xwe bidin HDP’ê. 

 

'DIVÊ KURD DI HILBIJARTINÊ DE BIBIN YEK’ 

 

Hasan Çîftçî jî, îtifaqa AKP-MHP’ê û îtifaqa CHP-Partiya ÎYÎ-SP-DP’ê bi bîr xist û diyar kir ku ev îtifaq hemû ji bo berjewendiyên xwe tevdigerin. Çîftçî diyar kir ku divê gelê kurd di hilbijartinê de dengê xwe bidin vîna xwe û bibin yek. Fahrettin kaya jî, diyar kir ku tekane partiya ku wan ji xizanî û şer xelas bike HDP ye û got: “Tu pirsgirêka HDP’ê ya bendavê tune ye. Çavê gelê me vekiriye. Dê dengê xwe bidin xwe û em ê bi ser bikevin.” 

 

‘JI BO ZAROKÊN ME Û PÊŞEROJA ME HDP’ 

 

Sevîm Keleş jî diyar kir ku ew ê ji bo zarokên û pêşeroja xwe dengê xwe bidin HDP’ê. Keleş diyar kir ku dê gelê kurd qethiyen dengê xwe nede îtifaqa AKP-MHP’ê û got: “Heta mirinê jî em ê ji bo azadiyê dengê xwe bidin HDP û Selahattin Demirtaş.” 

 

Hesin Erkol jî bi lêv kir ku dê hilbijartina 24’ê Hezîranê ji bo gelê kurd hilbijartineke dîrokî be û got: “Ev hilbijartin ji bo gelê kurd bersiva zaliman bide firsendek e. Bila kurd tiştên li Sûr, Şirnex, Cizîr, Nisêbîn, Gevere pêk hatin ji bîr nekin. Divê kurd û tirk div ê hilbijartinê de bi hev re dîktatoran têk bibin û biratiya gelan bi ser bikeve. Di vê hilbijartinê de divê herkes destê xwe deyne ser wijdanê xwe û dengê xwe bi kar bîne. Divê kesek wekî kaxezekê li dengan nenêre.” 

 

'TENÊ BI HDP’Ê AŞTÎ PÊKAN E’ 

 

Fadîle Yilmaz jî anî ziman ku ji bo aştî pêk bê ew ê dengê xwe bide HDP’ê û got: “Em ji bilî HDP’ê baweriya bi sozên hilbijartinê yên tu partiyê nayînin. Eger Selahattin Demirtaş ji girtîgehê derketana dê aştî pêk bihatana. Înşeleh dê di demeke kurt de Demirtaş derkeve û bi ser bikeve. Di 24’ê Hezîranê de dengê me ji bo HDP’ê ye.”