RIHA -  Hevserokê PYD'ê Salîh Muslim, anî ziman ku dema di nava lêgerînê de bû di sala 1978'an de Rêberê PKK'ê Abdullah Ocalan nas kir û wiha got: “Rêber Ocalan heta ku azad nebe, em çi bikin jî kêm dimîne." 

 

Rêberê PKK'ê Abdullah Ocalan di 9'ê Cotmeha 1998'an de bi destê hêzên navdewletî û komploya navdewletî ji Sûriyeyê hat derxistin. Hêzên navdewletî bi hevkariyê Rêberê PKK'ê Abdullah Ocalan di 15'ê Sibata 1999'an de radestî Tirkiyeyê kirin. Ji wê rojê heta niha 25 sal in Ocalan li Zindana Îmraliyê ya Tîpa T a Ewlehiya Bilind di yek hucreyê de di şertê tecrîdê de tê girtin. Gelê kurd 24 salin ji bo azadiya Rêberê xwe gelek calakiyên cuda pêş xistin. Her tim ji bo azadiya rêberê xwe bi çalakiyên cuda derketin kolanan û bertekên xwe anîn ziman. Di her 9'ê Cotmehê û 15'ê Sibatê de bi girseyî derketin kolanan û komploya navdewletî şermezar kirin. Ocalan jî di van 25 salan her tim bi fikr û felsefeya xwe, bi lêhûrbûn û bonijandina xwe paradîgma û felsefeyek nû pêş xist. Her tim ji bo mirovahiyê û jiyanek xweş û aram ket nava lêgerîn û çareseriyê. Gelek caran di hevdîtinên xwe de ji bo hikûmetê pêşniyarên çareseriyê pêş xist. Herî dawî destnîşan kir ku eger hikûmet gavan bavêje, dê karibe pirsgirêkê di hefteyekî de çareser bike. Lê hikûmetê li şûna gavan bavêje, rê li pêş heyetê girt û bêtir xetimand. 

 

îro Bakur û Rojhilatê Sûriyeyê li ser felsefe û paradîgmaya Rêberê Gelê Kurd Abdullah Ocalan modelek nû ya jiyane ava dike. îro li Bakur û Rojhilatê Sûriyeyê hemû jin, ciwan û kesên di nava saziyên sivîl de cihên xwe digirin û karên rêxistinî dimeşînin, di heman demê de di nava rêxistinên wekî; YPG-YPJ, TEV-DEM, Mala-Jin û Mala-Gel de bi vîna xwe di nava qada parastina cewherî de cih digirin. 

 

Hevserokê Partiya Yekîtiya Demokratîk (PYD) Salih Muslim ku demekê bi Rêberê PKK'ê Ocalan re maye, der barê avakirina felseyefa Rêberê PKK'ê Abdullah Ocalan ku li Bakur û Rojhilatê Sûriyeyê geş dibe û tecrîda li Îmraliyê nirxandinên girîng ji Ajansa Mezopotamya (MA) re nirxandin kir. 

 

'BU BERSIVA LEGERÎNA ME' 

 

Hevserokê PYD'ê Salîh Muslim, ewil bal kişand ser nasîna xwe ya bi Rêberê PKK'ê Abdullah Ocalan re û wiha got: "Dema ez di nava lêgerînê de bûm, min Rêber Abdullah Ocalan nas kir. “Ez di sala 1977'an de li Zanîngeha Teknîkê ya Stenbolê mezun bûm. Di sala 1978'an de ez ji bo xebatê çûm Erebîstana Siûdî. Min li vir tevgera azadiyê nas kir. Hin qadroyên partiyê wekî karker hatibûn vir. Em jî ciwan bûn û lêgerînên me jî hebûn. Em di lêgerîna ku pirsên me bibersivîne debûn. Dîsa em li tevgera ku rastiya kurdan analîz bike, digeriyan. Dema ez ciwan bûm, ez ji kadroyan fêr bûm ku tevgera azadiyê hatiye avakirin. Wê demê têkiliyên min bi tevgera azadiyê re pêş ket. Di salên 1980’yî de têkiliyên me zêde bûn. Ji ber ku em dixebitin salê carekê mafê me yê destûrê hebû. Di sala 1983'an de ez derketim destûra salê, yekem car li Şamê min Reber Ocalan dît û rû bi rû em axivîn. Ji ber ku berê min wêneyê wî nedîtibû, min ew nas nekir. Beriya wê di salên 1981,1982'an de di çarçoveya xebatên partiyê de têkiliyên me hebû. Em bi rêya telefonê diaxivîn. Wê demê telefon ne mîna niha pêşketîbûn. Çend sal şûnde dîsa min Rêber Ocalan dît. Li Erebîstana Siûdî tevgera wî mezin bû. Ez di sala 1990'an de vegeriyam Rojava. Wê demê min bêtir Rêber Ocalan dît û me bêtir sohbet kir." 

 

'PLANÊN HEGEMONAN SEROBIN KIR' 

 

Muslim, destnîşan kir ku hêzên navdewletî û hêzên hegomon xwedî projeyek bûn û wiha got: "Komploya navdewletî projeya wan e. Bi vê projeyê xwestin Rojhilata Navîn, li gorî xwe ji nûve plan bikin. Xêz bikin. Lê Rêberê PKK'ê Abdullah Ocalan ev plana hêzên hegomon tev li hev kir. Hêzên navdewletî xwestin li gorî keyfa xwe ji nûve sînorên dewletan xêz bikin û li gorî xwe rêveberiyên wan diyar bikin. Di vê projeyê de cih ji kurdan re tune bû. Kurd tev li hesabê xwe nekiribûn. Lê Rêberê Gelê Kurd Rêber Ocalan gel hişyar kir û plana hêzên navdewletî pûç kir. Palan hêzên navdewletî sero bino kir. Hêzên navdewletî xwestin statuya gelê kurd tune be. Ji ber vê yekê xwestin ku xwe ji Rêber Ocalan rizgar bikin. Li aliyê din Dewleta Tirk dixwest xwe wekî Serokê Projeya Mezin a Rojhilata Navîn (BOP) îlan bike. Piyê komployê yê yekemîn li vir dest pê kir. Hêzên Navdewletî Ocalan dîl girtin û radestî Tirkiyeyê kirin. Her çend Tirkiye bibêje min ew girtiye jî nerast e. Ji xwe Serokwezîrê wê demê Bulent Ecevit jî gotibû 'Wekî bombeyekê avêtin hembêza me. Çima şandin ji mere ez jî nizanim.' Yên komplo amadekirin bi ser neketin. Lê gelek bandorên komployê çêbûn." 

 

'ŞOREŞA ROJAVA BERHEMÊN FIKRÊN RÊBER OCALAN IN' 

 

Salih Muslim, da zanîn ku jiyan û pergala ku li Bakur û Rojhilatê Sûriyeyê avabûye, îro bi proje û paradîgmaya Rêberê PKK'ê Abdullah Ocalan bi ruh bûye û wiha lê zêde kir: "Rêber Ocalan dema di sala 1979'an derbasî Kobanê bû, çend kes bûn. Dema li Lubnanê bi Filistiniyan re ket têkiliyê, sinc û nerînek din da wan. Pîvanek nû da wan, Rêber Ocalan di sala 1982'an de ji ber van pîvan û sincê xurt gele hevalên wî şehît ketin. Gelek hevalên wî hatin girtin. Gelek ciwan ji Rojava çûn tev li akademiya Mahsum Korkmaz bûn. Ji Kobanê tevlêbûn pir pir zêde bû. Destkeftiyên hatin bidestxistin, bi şerê dirêj û berxwedana zêde ya li kozikan hat bidestxistin. Dema di sala 1983'yan de Filistînî ji Lubnanê hatin derxistin, Rêber Ocalan derbasî Şamê bû. Wê demê gelek kesên tên nasîn hatin cem Rêber Ocalan û çûn. Gelê Rojava birçîyê zanînê bû. Gelê rojava birçiyên Şoreşê bûn. Li ku berxwedanek hebûya diçûn tev li têkoşînê dibûn. Hemû gelê Rojava li gel Rêber Ocalan bû. Wî hişt ku gelê Rojava bêtir têkoşînê xurt bike. Kesên xwestin kurdan terbiye bikin, di 2004'an de li  Qabişloyê bi berxwedanê hat terbiyekirin. Ji sala 2011'an heta niha li Rojava şoreşa ku aj daye her ku diçe geş dibe. Şoreşa ku îro geş dibe berhema fikr û felsefeya Rêber Ocalan e. Rêber Ocalan zikê gel têr kir." 

 

'NETEWEYA DEMOKRATÎK NE TENÊ JI BO GELÊ KURD E' 

 

Muslim, destnîşan kir ku pergalê berê bi hemû nirxên gel lîstibû û wiha pêde çû: "Gel heqîqeta xwe ya bi destê hêzên serdest winda kiribû, dîsa bi pergala  Neteweya Demokratîk ji nûve bi dest xist. Fikrên Rêber Ocalan û paradîgmaya Rêber Ocalan pir zêde bi bandor e. Rêber Ocalan 40 sal berê gelê kurd ji xewa giran hişyar kir. Niha firk û felsefeya gelê kurd heye. Berê jî lehengên gelê kurd ên wekî Qazî Muhammed, Şeyh Said, Seyîd Riza û gelek kesên din hebûn. 

 

Raste. Lê van kesan ji bo gelê kurd çi kirin. Negihiştin armancên xwe. Rêber Ocalan digot 'Berî her tiştî şoreşa fikr û ramanê ji bo me lazim e. Têkoşîn tenê bi çikan têr nake. Tişta herî zor şoreşa mejî bû. Lê Rêber Ocalan tercîha herî zahmet kir û dest bi şoreşa hişmendî û mejî kir. Pergala Modernîteya Demokratîk Neteweya Demokratîk û Xweseriya Demokratîk li Rojava pêş xist. Ocalan Neteweya Demokratîk tenê ji bo gelê kurd pêş nexist. Ji bo hemû gelên bindest û hemû gelên din ev felsefe pêş xist." 

 

'BANGA OCALAN KOBANÊ AZAD KIR'

 

Salin Muslim, bilêv kir ku DAIŞ'ê xwest Kobanê bi dest bixe û wiha berdewam kir: "Li dijî hovîtî û tarîtiya DAIŞ'ê berxwedanek pir dîrokî pêş ket. 9 sal di ser salvegera Kobanê re derbas bû. Kobanê ji bo gelê kurd sembola berxwedanê ye. Yek ji cihê herî zêde kurdan lê li ber xw-e daye vir e. Ji ber vê yekê Kobanê sembol e. Fikr û refleksê Birêz Ocalan a li ser rizgarkirina Kobanê gelek girîng e. Yên li dijî DAIŞ'ê li ber xwe dan, ji hest û paradîgmaya Rêber Ocalan hêz girtin. Rêber Ocalan got 'Divê kobanê neyê xwar' Piştî vê gotinê bi hezaran Kurdistaniyan ji çar aliyê Kurdistanê berê xwe dan Kobanê. Ev serkeftin, serkeftina rêber Ocalan e."

 

'25 SAL IN LI IMRALIYÊ ÎŞKENCE HEYE' 

 

Muslim, bibîr xist ku Rêberê Gelê Kurd Abdullah Ocalan 25 sal in di şertê tecrîdê de di yek hucreyê de tê ragirtin û wiha dirêj kir: "35 meh in bi tu awayî agahî ji Rêber Ocalan nayê girtin. Tecrîdê her ku diçe giran dibe. Tecrêdê giran dikin. Li pergala Îmraliyê 25 sal in îşkence heye. Rêber Ocalan kurd ji goristanê derxist û ji nûve zindî kir. Hemû plan û projeyên hêzên serdest û hegomon tev li hev kir. Dewleta tirk ji bo hêzên navdewletî gardiyaniyê dike. CPT jî diçe Îmraliyê û ziyaretan dike, lê van raporên xwe bi raya giştî re parve nake. Rêber Ocalan gelê kurd ji goristanê derxist û azad kir. Lê niha pergal jî dixwaze Rêber Ocalan têxe wê goristanê. Divê hemû gelê kurd vê rastiyê baş bibînin." 

 

'HETA REBER OCALAN AZAD NEBE, TU ÇI BIKÎ JÎ KÊM E

 

Salîh Muslim, herî dawî destnîşan kir ku bi milyonan azadiya fizikî ya Rêberê Gelê Kurd Abdullah Ocalan dixwazin û wiha bi dawî kir: "Li cîhanê pêngava "Ji Rêber Ocalan re azadî, ji statuya gelê kurd re çareseriya siyasî" dan destpêkirin. Dostên kurdan di 10'ê Cotmehê di li 74 navendan di 10'ê Cotmeha 2023'an de pengava gerdûnî dan destpêkirin. Komployên ku dest Pê kiribûn îro didomin. Ji ber vê yekê heta ku Rêber Ocalan bi awayekî fizîkî azad nebe, dê her tişt kêm û nîvco bimîne. Heta Rêber Ocalan azad nebe, em çi bikin jî kêm e." 

 

MA - Emrûllah Acar