WAN – COLEMÊRG – Li Wan û Colemêrgê 1’ê Gulanê Cejna Karker û Kedkaran bi coş hat pîrozkirin. 

 

Li Wanê bi pêşengiya KESK, DÎSK, TMMOB û TTB’ê 1’ê Gulanê Cejna Karker û Kedkaran li Parka Aştiyê ya Musa Anter hat pîrozkirin. Girse ji sê deriyan ve herikî qada mitîngê. Rêveberên KCD, HDP, DBP, EMEP, ESP, ÎHD û saziyên jinan û bi hezaran kes tev li mitîngê bûn. Pankartên têkildarî wateya rojê li qada mitîngê hatin daliqandin. 

 

Beriya bername dest pê bike goveng hat gerandin.  Parlamentera HDP’ê ya Amedê Feleknas Uca dema hat qadê bi coşek mezin hat pêşwazîkirin. Girseyê bênavber dirûşmeyên "Bijî Yek Gulan, Bijî Aşitî" û "Bijî Berxwedana Zîndanan" berz kirin. 

 

Bername bi rêzigirtinê dest pê kir. 

 

Seher Kadîroglu Ataş li ser navê Komîteya Amadekar axivî û bi bîr xist ku 110 hezar kedkar îxrac bûn û neheqiya li ser karker û kedkaran dewam dike. Ataş anî ziman ku di pêvajoyek şer diqewime, jin tên kuştin û xweza û axa wan tê talankirin de diçin hilbijartinê û dê bersiva wan bê dayîn. 

 

UCA: CEJNA OCALAN Û GIRTIYAN PÎROZ BE

 

Parlamentera HDP’ê Feleknas Uca jî axivî û wiha got: “Em cejna Rêberê Gelê Kurd Abdullah Ocalan û girtiyên siyasî pîroz dikin. Rojên azadiyê pir nêz in. Em di rojên dîrokî de derbas dibin. Bi OHAL’ê û KHK’yan bi hezaran kedkar ji karê xwe bûn. Dê gelê me yê Wanê di 24’ê Hezîranê de bersiv bide siyaseta tifaqa AKP û MHP’ê. Wan ji 24’ê Hezîranê re jixwe amade ye. Wê têkoşîna azadî û demokrasiyê bi ser bikeve.” 

 

Piştî axaftina Uca, Koma Rojerya derket ser dike strî. Mitîng bi gerandina govendê xelas bû. 

 

COLEMÊRG

 

Saziyên ked û demokrasiyê li Colemêrgê jî li Bazara Gel 1’ê Gulanê pîroz kirin. Pîrozbahî di bin siya çekên polîsan de pêk hat. Rêveberên HDP, DBP, CHP û nûnerên saziyên civakî û gelek welatî tev li pîrozbahiyê bûn. Piştî axaftinên hatin kirin, mitîng li ber guhdarkirina stranan û govend gerandinê qediya.