AMED – 7’emîn Dadgeha Cezayê Giran a Amedê carek din daxwaza girtina kujerê Kemal Kurkut polîs Y.Ş. red kir. Heyetê danişîna dozê taloqî 20’ê îlonê kir. Polîsê kujer Y.Ş. li pêş kamera û rojnamegeran Kurkut kuştibû û niha serbest tê darizandin.
Di Newroza 21’ê Adara 2017'an de ya li Amedê ciwanê bi navê Kemal Kurkut ji Meletiyê hat xwest tev li pîrozbahiya Newrozê bibe ji aliyê polîs Y.Ş. ve hat kuştin. Kurkut li ber çavê rojnamegeran hat kuştin. Bi sûcdariya “Kuştina qestî ya muhtelemel” der barê polîs de doz hat vekirin. Danişîna duyemîn a dozê ku polîs serbest tê darizandin li 7’emîn Dadgeha Cezayê Giran a Amedê dest pêk ir. Li derdora edliyê û hundir tedbîrên ewlehiyê hatin sitendin.
Yên hatin salona dadgehê di lêgerîna polîsan de derbas bûn. Dayika Kurkut, Secan Kurkut û birayê wî Ferhat Kurkut, xizmên Kurkut, Parlamentera HDP’ê ya Amedê Sîbel Yîgîtalp, Alîkarê Hevserokên Giştî yê ÎHD’ê Racî Bîlîcî, rêveberên HDP û DBP danişînê şopandin.
KESABÊ ŞAHID: MIN JI POLÎSAN RE GOT
Dozê bi xwendina belgeyên dosyeyê dest pê kir. Xwediyê kasab ê ku Kurkut kêr jê girtibû Şaban Bîlen wek şahid hat guhdarkirin û got: “Serê sibê saet li derdora 08.00’an hat dikanê û silav da min. Dema min pişta xwe daye, kêrê ji ser tezgahê hilda û reviya. Ez jî fikirim ku dibe li derve bi hinekan re şer bike, min wî girt. Lê ji destê min reviya. Pir bêdeng ketibû hundir. Piştî ku reviya ez li 155’î geriyam û min got ku ji kargehê kêrê biriye û reviyaye. Her wiha min ji polîsên wê derdorê re jî got. Pişt re min dît ku polîsek li pey wî beziya.”
Pişt re serokê dadgehê dev ji guhdarkirkirina polîsên dê bibûna şahid berda. Dadger got ku ew ê piştî rapora Saziya Tiba Edlî ya dê têkildarî bûyerê amade bike îfadeyên polîsan bigire.
DAYIK KURKUT: BÊLESEBEP KEMALÊ MIN KUŞTIN
Di vê navberê de parêzera malbata Reyhan Yalçindag Baydemîr mafê axaftinê girt û xwest mafê axaftinê bidin dayika Kurkut, Secan Kurkut. Secan Kurkut destê xwe li maseyê da. Di vê kêliyê de dadger ji dayikê re got: “Destê xwe li maseyê neden.” Dayik Kurkut axaftina xwe domand û got: “Ev edaletek çawa ye. Kemal çi kiribû? Cezayê Kemal çibû? Bêlesebep li Kemal dan. Ceza bila ne ji we bila ji Xwedê bê. Kemal çi kiribû. Bila xwedê bela xwe bide wî qatilî.”
Serokê dadgehê dîsa axaftina dayika Kurkut birî û got “temam temam” û xwest ji dayik ji salona dadgehê derbikeve. Dayik Kurkut ji salonê derket.
'DIKARIBÛN WÎ BI SAXÎ BIGIRIN’
Pişt re parêzer Reyhan Yalçindag Baydemîr mafê maxaftinê girt û parastina doza malbatê kir. Yalçindag Baydemîr got ku Kurkut dikaribûn bi saxî desteser bikirina.
POLÎSA XWE MAFDAR DERXIST Û KEMAL KURKUT NEHEQ KIR
Bersûcê bûyerê polîs Y.Ş. jî parastina xwe kir û xwest xwe ji bûyêr rizgar bike. Y.Ş. xwe mafdar derxist û got ku kes nikare bi kêrê bikeve qadê. Y.Ş. bûyerê ji nedîtîva hat û Kurkut sûcdar kir.
DANIŞÎN TALOQ BÛ
Piştî axaftin û parastinan heyeta dadgehê daxwaza girtina bersûc carek din red kir û ji bo kêmasiyên dosyeyê temam bibin danişînê taloqî 20’ê îlonê kir.
‘BERSÛC TÊ PARASTIN’
Piştî danişînê bi beşdariya Parlamenter Sîbel Yîgîtalp li ber edliyê daxuyanî hat dayîn. Yîgîtalp destnîşan kir ku redkirina daxwaza girtina bersûc edalet û hiqûqê serûbin dike û li gel bûyer pir şîrove hat kişandin û hat dîtin jî lê bersûc hêj bi alîgiriya darazê nayê girtin.