NAVENDA NÛÇAYAN - Hevşaredara Bajarê Mezin a Amedê ya dîlgirtî Gultan Kişanak, diyar kir ku Ozgurlukçu Demokrasî dengê girtîgehan e û bi desteserkirina wê re mafê raya giştî ya agahîgirtinê hatiye desteserkirin.
Hevşaredara Bajarê Mezin a Amedê Gultan Kişanak ku li Girtîgeha Tîpa F Hejmara 1'ê ya Kocaeliyê dîl girtî ye, nameyek şand ji rojnameya Ozgurlukçu Demokrasî re û desteserkirina rojnamê şermezar kir.
Kişanak, diyar kir ku ew tayînkirina qeyûm a ji bo rojnameya Ozgurlukçu Demokrasî û Çapxaneya Gun şermezar dike û got: “Hêvîdarim ku wê rojname di demek nêz de carek din bigihêje ber destê xwendevanên xwe. Azadiya çapemeniyê ji azadiya rojnamevanan a ji bo ragihandina rastiyê bêhtir, mafê raya giştî yê wergirtina agahiyên rast e.”
Kişanak, anî ziman ku ew êrîşa li dijî rojnameya Ozgurlukçu Demokrasî weke êrîşa li dijî mafê wergirtina agahiyê dibîne û wiha dawî li nameya xwe anî: “Ji bo me girtiyên ku nikarin nûçeyên rast ji deverek din bişopînin, ev rewş pir girane. Rojnameya Ozgurlukçu Demokrasî her tim bû dengê girtîgehan. Bû dengê me, guhê me û wijdanê raya giştî. Em ê li bendê bimînin ku ji nû ve dest bi weşanê bike. Hêvîdar im ku di demeke nêz de dest bi weşanê bike."