STENBOL – Platforma Çapemeniya Azad a Stenbolê zext û girtina li dijî çapemeniyê şermezar kir û got: “Em ê nebin rojnamegerên ku dixwazin bikin yek tîp. Em ê bêdeng nebin.”
Platforma Çapemeniya Azad a Stenbolê bi boneya şermezarkirina zext û girtina li ser çapameniyê û rojnamegeran di demên dawî de zêde bû li Qada Galatasarayê li hev kom bûn û daxuyaniya çapameniyê da. Sendîkaya Rojnamegeran a Tirkiyeyê (TGS), Înîsiyatîfa Rojanmegerên Azad (ÎRA), parêzvanê mafê mirovan, Dayikên Şemiyê û gelek kes beşdar bûn û piştevaniya xwe nîşan dan. Di daxuyaniyê de pankarta “Ji rojnamegerên girtî re azadî” û dowîzên “Rojnamegerî ne sûc e” û “Çapemeniya azad nayê bêdengkirin” û wêneyên rojnamegerên girtî hildan. Dirûşmên li dijî zextên li ser rojnamegeran hatin berzkirin.
‘TIRKIYE DI YEK DENGÊ DE BICIH NABE’
Di çalakiyê de ewil Sekreterê Gitşî yê TGS’ê Mustafa Kulelî axivî û got: “Tirkiye di rojên darî de derbas dibe. Her roj hevalên me tên girtin. Em di pêvajoyek wiha de diçin hilbijartina zordest. Heke ku çapameniya azad tune be dê hilbijartinek jî azad jî ne pêkan be. Tirkiye di yek reng û dengî de bicih nabe. Tirkiye ji yek zilamî mezintir e. Em ê wek ferdên çapameniya azad her tim van bînin ziman. Hevalên me girtî berdin.”
‘WELAT BÛYE ZÎNDANA ROJNAMEGERAN’
Berdevkê ÎRA Hakki Botlan jî mafê axaftinê wergirt û wiha axivî: “Niha li Tirkiyeyê rojnameger nikarin biaxivin. Em bi bêdengiya xwe wan şermezar dikin. Heke rojnamegeran bêdeng bikin, dê welat bêdeng bikin. 200 rojnameger girtî ne. Divê mirov vî welatî wek welatê girtîgeha rojnamgeran binav bike.”
‘NIKARIN RASTIYÊ VEŞÊRIN’
Seroka Şaxa Komeleya Mafê Mirovan (ÎHD) a Stenbolê Gulseren Yolerî jî axivî û destnîşan kir ku kes nikare rastiyê ji wan veşêre û xwest rojnamegerên girtî bên berdan.
‘EM Ê NEBIN ROJNAMEGERÊN WE’
Endama Komîsyona Jinan a TGS’ê Seyhan Avşar daxuyaniya çapameniyê xwend û wiha got: “Her roj zext li ser rojnamegeran zêde dibin. Hejmara rojnamegerên girtî gihîşt 180 kesî. Em li qadan têkoşîna azadiya hevalên xwe didin, lê her roj rojnamger tên girtin. Di rojên derbasî de qeyûm tayînî rojnameya Ozgurlukçu Demokrasî û Çapxaneya Gun kirin û pişt re 27 hevalên me girtin. Hevpîşeyên me Pinar Gayîp, Semîha Şahîn û Adîl Demîrcî yên xebatkarên ETHA’yê hatin girtin. Tekane sûcê ewan ew e ku rojnamgeriyê dikin. Em dibêjin bila baş zanîn, em ê nebin rojnamegerên ku dixwazin bikin yek tîp. Em ê bêdeng nebin.”