AMED - Nûnerên partiyên Kurd biryara hilbijartina zordest nirxandin û gotin: “Erdogan û Bahçelî ji tirsan biryarek wiha stendin. Divê Kurd li hev kom bibin û bi hevre namzetekê diyar bikin.”
Nûnerên partiyên Kurd biryara hilbijartina zordest a îtîfaqa AKP-MHP’ê nirxandin. Partiya Maf û Azadiyê (HAK-PAR) dê nekare beşdarî hilbijatinên 24’ê Hezîranê bibe. Ji ber ku kar û xebatên wan ên rêxistinbûyînê temam nebûn, mafê ketina hilbijartinê bi dest nexistin. HAK-PAR dê di rojên pêş de hilwesta xwe ya hilbijartinê diyar bike.
‘ERDOGAN-BAHÇELÎ JI TIRSAN DIÇIN HILBIJARTINÊ’
Serokê Giştî yê Partiya Azadî û Sosyalîzmê (OSP) Sînan Çîftyurek, biryara hilbijarina zordest nirxand û wiha axivî: “Ev encama tirsa îtîfaqa komarê ye. Tirsa wan a herî mezin jî Kurdin. Ji tirsa windakirina xwe çûn biryarek wiha. Di çavên gel de Bahçelî bû dûvê AKP’ê. Erka lastîkê yedek kir. Ger Bahçelî beşdarî vê îtîfaqê nebûya dê winda bikira. Cardin niha krîza aborî heye. AKP ji vê jî pir tirsiya. Du holdîngên mezin ên Tirkiyeyê êdî nikarin deynên xwe bidin. Fabriqeyên şekir arizîkirin. Hemû rêyên hewayî û hêsên ên dewletê firotin. Dîsan jî nekarin pêşiya bilindbûna dowîzan bigirin. Îtîfaqa dît krîza aborî mezin dibe, xwest bi hilbijatinê xwe ji vê krî rizgar bike.”
Çîftyurek, anî ziman ku ligel vê yekê dê Efrîn dawiya Erdogan bîne û wiha got: “Ger îdîaya kîmyesalê yên Sûriyeyê tunebûna, dê Rûsya û Tirkiye ji Efrînê bihatan derxistin. Cardin Erdogan propagandeya piştî Efrînê, dê biçin Minbîç, Qamîşlo, Kobanê û Şengalê kir. Erdogan baş dizanîbû dê nekara vê yekê bike. Berî ev binkeftinên Erdogan derbikevin holê, biryar hilbijartina zordest da. Dîsan îtîfaqa AKP-MHP’ê ku HDP’ê ji bo xwe weke rakîp dibîne, xwest bê amadekar bigire.”
‘DIVÊ KURD LI HEV KOM BIBIN’
Çîftyurek, da zanîn ku divê partiyên Kurd li dijî hilbijartina zordest li hev kom bibin û wiha bi dawî kir: “Divê di çarçoveya ‘Kurd pêvajoyê nîqaş dikin’ de Kurd cardin bên gel hev. Erdogan rêzê nade encamên hilbijartinên vîna gel. Gelê me bi dengên xwe parlamenteran hilbijêre, lê Erdogan wan dike girtîgehan. Çi dibe bila bibe dîsan dibê em dengên xwe bikar bînin û xwedî derbikevin. Ku Erdogan hilbijartinan wina da bike, dê pergala serokatiyê jî winda bike.”
‘DÊ HILBIJARTIK NE DEMOKRATÎK BE’
Rêveberê HAK-PAR a Amedê Paşa Akdogan jî, diyar kir ku AKP bi helwestek êrîşkar nêzê Kurdan dibe û wiha axivî: “Îtîfaqa AKP-MHP’ê dijminantiya Kurdan dike. Hilbijartina zordest dê tu bandorê li demokrasiya Tirkiyeyê neke. Mînak me xebatên xwe yên rêxistinbûnê bi rêve dibirin. Lê ji ber hilbijartina zordest em nikarin bikevin hilbijartinê û em asteng kirin. Dê ev hilbijatin qet ne demokratîk be. Dibin şert û mercên OHAL’ê de çûyîna hilbijartinê ne meşrûye.”
‘DIVÊ EM DEST BIDIN HEV Û LI DIJÎ REJÎMA SERDEST DERBIKEVIN’
Akdogan, bal kişan ser helwesta dê di hilbijartinên zordest de nîşan bidin û wiha bidawî kir: “Em ê serî li hemû rêxistinbûyînên xwe yên 30 bajaran bidin. Biryara Meclîsa Partiya me, dê ji bo me girîng be. Di pêvajoyek wiha de em dixwazin Kurd bibin yek. Ji xeynî Kurdan, dostên Kurdan tuneye. Divê hemû siyasetmedarên Kurd vê rastiyê baş bibînin. Li ser îtîfaqan jî xebatên me hene. Em dest bidin hev û li dijî rejîma serdest û zordest derbikevin.”