WAN – Serokê Giştî yê AKP’ê Recep Tayyip Erdogan, di civînekê de got: “Ez ê partiya ku têkiliya xwe ya bi terorê qut nake, di sindoqan de veşêrim.” Waniyan bersiva Erdogan dan û gotin: “Em ê di 24’ê Hezîranê de bibînin ka kî kê vedişêre.”
Serokê Giştî yê AKP’ê Recep Tayyip Erdogan, di civînekê de got: “Ez ê partiya ku têkiliya xwe ya bi terorê qut nake, di sindoqan de veşêrim.” Waniyan bi awayekî tund bersiva van gotinan dan û gotin: “Em ê di 24’ê Hezîranê de bibînin ka kî kê vedişêre.”
'DÊ ÎTIFAQ LI HERÊMÊ WINDA BIKE’
Welatiyê bi navê Aydin Gok got: “Jixwe gelek heqaretan li me dike. Hemû siyasetmedarên me digire. Hemû parlementerên me di girtîgehê de ne û hilbijartinê çêdike. Heqareteke wisa nehatiye dîtin. Divê parlementerekî jî nestînin. MHP dixwaze AKP qezenc bike, lê dê herdu jî qezenc nekin. Erdogan bal dikişîne ser xebatên qeyûman. Lê di serdema wan de tu tiş nehat kirin. Hemû xebat ên serdema DBP’ê ne. Ew keda DBP’ê dixwin. Teqez dê AKP li herêmê winda bike.”
'HELA BILA HIŞBIJARTIN ÇÊBIBE; BÊ KÎ KÊ VEDIŞÊERE’
Huseyîn Akdag jî, diyar kir ku li herêmê siyaseta AKP’ê têk çûye û got: “Kurda baş dizanin ka Erdogan çi bi wan kiriye. Jixwe îtifaqa wan a bi MHP’ê re li van deran ew bi temamî qedandin. Ji ber şer û pevçûnên dawî, gelê kurd hêla xwe bi awayekî zelal diyar kir. Heta mehek berê jî Erdogan digot ‘yê doza hilbijartina pêşwext bike îxanetê dike.’ Lê çi qewimî ku ew niha hilbijartinê pêk tînin. Eger ev siyaset rêzê nîşanî vîna gel nde, teqez dê ew siyaset têk biçe. HDP partiyeke ku li gor qanûnên vî welatî hatiye damezirandin. Her parlementerek me bi sedhezaran deng wergirtin, lê niha parlementeriya wan tê betalkirin. Ma ev ne teror e? AKP îxanet li vî gelî kir. Kî HDP’ê bişîbîne terorê, teror ew bi xwe ye.” Akdag, bertek nîşanî gotinên Erdogan ku gotin “Kî ehlê terorê be ez ê wan di sindoqan de veşêrim” da û got: “Hela bila hilbijartin çêbibe, bê kî kê vedişêre.”
'DIVÊ KURD BI AWAYEKÎ HÊZDAR GOTINA XWE BÊJIN’
Welatiyê bi navê Halîl Cancîn jî got: “Li qadekê komkirina cerdevanan û mirovên din ne îrade ye. Îradeya herkesî di dilê wî/wê de ye. Dema roja dengan hat, wê ev yek li wir xwe bide der. Erdogan der barê HDP’ê de çi dibêje bila bibêje, HDP partiyeke kurda ye û em destekê didin vê partiyê. Ew çi dibêje bila bibêje. Em ê roja hilbijratinê gotina xwe bêjin. Divê êdî kurd xwe nas bikin û li gorî wê bi awayekî hêzdar gotina xwe bêjin.”
Şukru Akdogan jî got îtifaqa wan li ser tunekirina kurdan hatiye çêkirin û gelê kurd baş hay ji vê yekê heye. Akdogan, diyar kir ku gelê wan xwe baş nas dike û got: “Dê roja hilbijartinê encameke wisa derkeve, wê nikaribe lu Stenbolê jî bisekine. Siyasetmedarên me tune bin jî, gel baş hay ji hin tiştan heye û dizanin dê rewş çi be. Divê armanca HDP’ê herî kêm ji sedî 15 be.”