Her sal li Tirkiye nêzî milyonek mirov li nava zeviyan karê demsalî dikin. Karkerên demsalî bi kedek zêde û heqekî kêm kar dikin. Li Tirkiye nêzî 27 milyonu mirov kar dikin. Jê 5 milyon û 85 hezar kes karê zeviyan dikin. Li gorî daneyên Wezareta Ewlehiya Karên Xebatê û Civakê nêzî 300 hezar kes karên demsalî dikin. Lê li gorî qeydên fîîlî nêzî milyonek kes karên demsalî yên nava zeviyan dikin. Karkerên demsalî ku keda wan tê binpêkirin di nava şert û mercên dijwar de kar dikin. Pirsgirêka av, xwarin, vexwarin, şuştin, paqijî, tenduristî, perwerdehî û civakî di asta jor de ye. Li gorî dane û rapora Meclîsa Ewlehiya Kar û Tenduristiya Karkeran (İSİG) di sala 2016'an de herî kêm 389 karkerên demsalî yên çandiniyê di kar de jiyana xwe ji dest dan. Di 7 mehên sala 2017’an de herî kêm 190 karkerên demsalî yên çandiniyê jiyana xwe ji dest dan. Hikûmetê der barê karkerên demsalî de sala par xebatek da despêkirin û di rojnameya fermî de weşand. Lê ji wê demê heta niha tu gav nehatin avêtin. Di nava karkerên demsalî de herî zêde kurd dixebitin. Kurd ji bajarên xwe berê xwe didin bajarên Rojavayên Tirkiye û harê herî zor û zahmet dikin. Karkerên ku ji bajarên xwe koçî Manîsayê kirin karê rezên tirî, fireng û pembo dikin. Karkerên demsalî yên hatin navçeya Akhîsar a Manisayê qala şert û mercên kar kirin. 

 

'KAR LI KU BE EM LI WIR IN'

 

Malbata Alfîdan, 2 meh berê ji Dîlokê hatine navçeya  Akhisara Manîsayê bi cih bûn. Ji malbata Alfîdan Meryem Alfidan, diyar kir ku li vir xaniyek bi 650 lira kirê kirine û li benda kar in. Alfidan, anî ziman ku ji ber betal in û nikarin debara xwe bikin hatine li vir li kar digerin û kar li ku be ew jî diçin wir û wiha got: "Jiyana me jiyanek koçerî ye. Kar li ku be em diçin wir. Ger ku karê me û pîşeyek me hebûya em dê çima bajar bajar bigeriyane? Hevser û zarokên min di nava zeviyan de kar dikin. Ji serê sibê heta êvaran em di nava axe de kar dikin. Toza wê zor û zahmetiyên wê gelek zêde ne. Em li vir nexweş dikevin nikarin biçin doktor. Ji sibê heta êvarî em karê zeviyan dikin. Kedek mezin didin, lê heqê vê kedê kêm e."  

 

Ji malbata Kavak jî Gulten Kavak ji Artuklu ya Mêrdînê 8 meh berê tevî 5 zarokên xwe hatine li navçeya Akhisarê bi cih bûne û karên zeviyan dikin. 

Kavak, anî ziman ku ji ber li Mêrdîn nikarin debara xwe bikin û kar tune hatine li vir di nava zeviyan de kar dikin û wiha got: "Ger ku karê me hebûya em nedihatin vir. Me ax û warê xwe berdaye em hatine vir. Jiyana me xweş bû. Hemû cîranan hev nas dikir. Lê ji neçarî me cîranê xwe û warê xwe berdaye û em hatine vir. "

Karker Hasibe Oral jî bal kişand ser zor û zahmetiyên kar û ani ziman ku ji ber pirsgirêka aborî neçarin hatine vir.