MANÎSA - Kerem Taylan ê piştî du salan ji Doza Manîsayê tehliye bû, diyar kir ku di qawîşên 14 kesî de 26 girtî lê dimînin û got: “Midûrê girtîgehê bi gotinên ‘odeyên me yên xweseran hene, hejmara wan hindikin, hûnê tê de rehet bikin’ qawîşên xweseran ferzî girtiyan dike.”
Doza Manîsa di 11’ê Nîsanê de hat dîtin û Kerem Taylan piştî du salan ji Girtîgeha Tîpa T a Manîsayê hat berdan. Taylan encamên Doza Manîsa nirxand û binpêkirinên mafên ên li Girtîgeha Tîpa T a Manîsay vegotin.
‘ARMANC HDP BÊ BANDOR KIRIN BÛ’
Taylan, diyar kir ku berî Newroa 2016’an li Manîsayê xwestin kurdên bi rêxistin kirî ji holê rabikin û wiha axivî: “Manîsa bajareke ku di hilbijarinên bên de dê parlamenterê HDP’ê derbixista bû. Ji ber vê hikûmetê operasyon pêk anî û xwest rastiyê ji holê rabike.” Taylan, anî ziman ku di Newroza 2016’an de cihê xwe di Komîteya amadekar de digirt û wiha got: “Ji ber vê yekê hatim binçav kirin. Em baş dizanin, ji ber ku em polîtîkayên AKP’ê rexne dikin tên sûcdar kirin. Dixwazin HDP’ê bê bandor bikin, xebat û rêxistinbûyan wê asteng bikin.
‘DI GIRTÎGEHÊ DE JÎ HEMAN POLÎTÎKAYAN BI RÊVE DIBIN’
Taylan, da zanîn ku di girtîgehê de jî heman polîtîkayan bi rêve dibin û wiha bi lêv kir: “Ez cara yekemîn ketin girtîgehê. Di ketina girtîgehê de lêgerîna tazî ferzî me kirin. Bi vê dixwazin rûmeta mirovan bişkînin. Dûre em kirin hucreyên yek kesî de. Pişt re ji bo vîna me bişkînin, tundiya fîzîkî li me girin. Di girtîgehê de 3 caran îşkenceya fîzîkî li min kirin. Ji ber ku hevalên min lêgerîna tazî qebûl nekirin hatin derpkirin. Bi dehan car derbarê me de doz vekirin. Di girtîgeh de muameleya hiqûqî pir cûdaye. Destpêkê îşkece li me kirin, dûre derbarê me de lêpirsîn vedikirin û cezayê disîplînê didan me.”
'PÎVANÊN BEDENÊN ME XWESTIN'
Taylan, dest nîşan kir ku bi hinceta OHAL’ê gelek mafên wan hatin desteserkirin û wiha domand: “Ji bo kincên yek tîpî pîvanên bedenên me xwestin. Gardiyan yek bi yek diketin odeyan û pîvanên bedenan xwestin. Lê em pîvanên bedenên xwe nedan wan. Cardin pêkanîna hejmara leşkerî li ser me tim ferz kirin. Ji ber ku me pêkanîna kincên yek tîpî şermezar kir, derbarê me de lêpirsîn û doz vekirin.”
‘DI QAWÎŞÊN 14 KESÎ DE, 26 KES TÊN GITIN’
Taylan, bal kişand ser pêkanînên keyfî yên girtîgehê û wiha pê de çû: “Di qawîşên 14 kesî de 26 kes tê de dimînin. Hevalên me li erdê dirazin. Bêhiqûqiyek mezin heye di girtîgehan de. Hewl didin girtî dest ji rêxistinê ber din û biçin qawîşên xweseran. Midûrê girtîgehê bi gotinên ‘odeyên me yên xweseran hene, hejmara wan hindikin, hûnê tê de rehet bikin’ qawîşên xweseran ferzî girtiyan dike.”
‘DÊ TÊKOŞÎNA ME BERDEWAM BIKE’
Taylan, di dawiya axaftina xwe de wiha got: “Em ê tu carî li hemberî polîtîkayên înkar û îmhayê serî netewînin. Ezê têkoşîna xwe berdewam bikim.”
MA / Zuhal Atlan - Ayşe Surme