ŞIRNEX - Li Cizîrê mala dawîn a piştî qedexeyê li ser piyan ma û li cihê ku avahiyên TOKÎ'yê lê tên çêkirin dimîne jî dixwazin hilweşînin. Şêniyên malê gotin “Em ê biçin ku derê?” û bertek nîşanî vê rewşê dan.
Li navçeya Cizîrê ya Şirnexê beriya du salan qedexeya derketina kolanan hatibû îlankirin û wextê qedexeyê bi dehan kes di jêrzemînên malan de asê bibûn û hatibûn şewitandin û kuştin. Piştî qedexe bi dawî bû li ser jêrzemînên ku tê texmînkirin hêj jî cenaze di wan de hene, dest bi çêkirina avahiyên TOKÎ'iyê hat kirin.. Di nav meheke dawîn de ji bilî malekê hemû malên li cihên TOKI’yan dimînin hatin hilweşandin.
Di cihê TOKî’yan de avahiyeke 3 qatî maye û tê xwestin wê jî hilweşînin.
Polîsên ku 4 roj berê hatin cihê TOKÎ’yan heya roja duşemê ji bo valakirina malê wext dan niştecihên malê. Xwediyê avahiyê malbata Elçioglu ku ev 2 sal in li ber xwe didin, li hemberî vê rewşê bertek nîşan dan.
‘MALBATÊN MALÊN XWE VALA KIRIN POŞMAN IN’
Xezal Elçioglu destnîşan kir ku wan piştî qedexeyê mesref li mala xwe kiriye û heya niha daxwaznanmeyên ji aliyê komên girêdayî Wezareta Hawirdor û Bajêr hatine dayîn jî îmze nekirine. Elçioglu da zanîn ku gelek caran polîs û xwediyên firmaya TOKÎ’yan ji bo ku ew ji malê derkevin hatine cem wan û wiha axivî: “Lê em derneketin. Gelek malbatên îmze avêtin daxwaznameyan niha poşman in. Her ku çû li vir hêjmara me kêmtir bû. Herî dawîn 3 malbat mabûn. 2 malbatan jî ew roj bi zorê ji malên wan derxistin.”
‘MALÊN KIRÊKIRÎ NIKARIN BIBÎNIN’
Elçioglu got ku gefa “Heke hûn daxwaznmeyan îmze nekin dê mal û erdê we jî ji destên we biçe” li wan hatiye xwarin û wiha berdewam kir: “2 roj berê jî polîs hatin malê. Xwestin em ji malê derkevin. Heya dûşemê wext dan me. Ji bo ku nifûsa me gelek e kes mala xwe nade me. Em nikarin malên kirêkirî bibînin. Ma em ê biçin ku derê?”