EDENE – Rêxistinên elewiyan bertek nîşanî çewisandin û girtinên li hemberî elewiyan dan û gotin: “Pîr Sûltan tenê ne navek e, di heman demê de baweriyk e. Em ê jî li pey Pîrê xwe biçin. Bedêla wê çi dibe bila bibe, ne muhîm e. Em ê jî li ber xwe bidin.”
Rêxistinên elewiyan ên li Edeneyê, bertek nîşanî girtina 16 elewiyên ku di 24’ê Adarê de li Erzinganê hatin girtin dan. Di nav kesên hatin girtin de Alîgirê Serookê Giştî yê Komeleya Çandê ya Pîr Sûlatn Abdalê (PSAKD) Erol Yeter jî hebû. Serokê Şaxa PSAKD a Edeneyê Şukru Şahîn, diyar kir ku ji ber çewisandinên îktîdarê hemû muxalif bi girtinan re rû bi rû ne.
'PÎR SÛLTAN TENÊ NE NAVEK E, BAWERIYEKE JÎ’
Şahîn, bi lêv kir ku di dîrokê de ne Muawiye, ne Yavûz, ne jî Yezîd bi ser neketine, bereksê wê kesên li hemberî wan li ber xwe dane bi ser ketine û dîroka mazlûman nivîsandine. Şahîn got: “Eger hûn bêjin piştî vê saetê hûn ê çi bikin, ez ê gotineke Pîrê me bi bîr bixim. ‘Yê ji riya xwe vedigere bila vegere, ez venagerim ji riya.’ Pîr Sûlatn tenê ne navek e, baweriyek e. Em jî li pey pîrê xwe ne. Em ê divêtiyên ola xwe bi cih bînin. Bedêla wê çi dibe bila bibe, ne muhîm e. Em ê jî li ber xwe bidin.” Şahîn destnîşan kir ku ew ji fitweyên AKP’ê yên li hemberî muxalifan natirsin û heta ew hemû dostên xwe wernegirin ew ê bitêkoşin.
‘DÊ EV KRÎZ ÇARESERIYÊ PEYDA BIKE’
Serokê Şaxa Komeleya Elewiyan a Demokratîk (DAD) a Edeneyê Zeynel Kete jî, bi lêv kir ku îktîdara AKP’ê ketiye nav krîzeke kûr û ji bo ji derheqê vê krîzê derkeve civakê diçewisîne. Kete, anî ziman ku krîz çareseriyê jî di xwe de dihebîne û got: “Hem pêşbîniyên me yên polîtîk, hem jî baweriya me nîşanî me dide ku, hemû polîtîkayên çewisîner û tepisandinê bi xwe re çareseriyê tînin.”
‘RÊBAZA CUDA YE, LÊ SENARYO Û DERHÊNER HEMAN IN’
Kete, diyar kir ku civaka ku bîadî îktîdarê neke tê çarmîxkirin. Kete, bi lêv kir ku ew elewî cara ewil bi mekanîzmayeke çewisandinê ya bi vî rengî rû bi rû nemane û di dîrokê de tim û tim li dijî feraseta yekparêz têkoşiyane. Kete got: “Di dîrokê de feraseta îktîdaran heman feraset e. Tenê tişta diguhere rêbaza çewisandinê ye. Baweriya elewîtiyê daxilî dewletê û îktîdarê nebûye, wekî baweriyeke ehlaqî û polîtîke dewm kiriye. Îktîdar dixwaze dîsa gomlekekî li elewiyan bike.” Kete destnîşan kir ku ew ê tu carî rizaya van kirinan nekin û divê ew muxalif û mazlum hemû bên cem hev û li dijî îktîdarê bitêkoşin.