STENBOL - Nivîskarê Rojnameya Ozgurlukçu Demokrasî Pakrat Estukyan, bertek nîşanî desteserkirina Rojnameya Ozgurlukçu Demokrasî da û wiha got: "Rojnameya Ozgurlukçu Demokrasî cihê ku min azad lê dinivîsî bû. Li Tirkiye ne tenê çapemenî, hemû qadên jiyanê di bin zextan de ye. Hikûmet dengê cuda tehamul nake." 

 

Bertek û nerazibûnên li dijî tayînkirina qeyûm û desteserkirina Rojnameya Ozgurlukçu demokrasî her ku diçe zêde dibin. Nivîskarê Rojnameya Ozgurlukçu Demokrasî Pakrat Estukyan, bertek nîşanî desteserkirina qeyûmê ya li ser Rojnameyê da û wiha got: "Di dîroka çapemeniya Tirkiye de 3 bûyerên bûne wekî remz hene. Yek jê şewitandina Rojnameya Tanê ye. Ya duyemîn bombekirina Rojnameya Ozgur Ulke ye. Ya seyêmin jî desteserkirina Rojnameya Ozgurlukçu Demokrasî û Çapxaneya Gun e." 

 

Estukyan, destnîşan kir ku tenê bi desteserkirina Çapxaneyê nehatin ser û pêve girêdayî hemû xebatkarên wê jî girtin û wiha got: "Sibê dema dîroka çapemeniya Tirikye bê nivîsandin dê ev roj bi tîpên reş ên stûr bên nivîsandin. Ev jî dê bibe wekî remzekê di roja diroka çapemeniyê de. Berê di kevneşopiya çapemeniya kurd de berdewamî hibû. Yek dihat girtin yek din derdiket. Wekî kevneşopiya partiyên kurdan ên siyasî jî wisa bû. Yek dihat girtin yek din dihat vekirin. Lê niha dest datînin ser û kar û bar zor dikin. Lê ez bawer dikim ku ev roj jî dê derbas bibin." 

 

ROJNAMEYA KURDÎ BI FÎÎLÎ HATIYE GIRTIN

 

Estukyan, bal kişand ser polîtîkayên îktîdarê yên li hemberî kurdî û wiha berdewam kir: "Hikûmet dê sibê bêje 'Kes nikare bin bi girtina weşana kurdî tawanbar bike. Me tiştek negotiye. Bila biçin li ku çap dikin bila bikin' Lê hemû çapxane di bin gefan de ne. Çapxaneya ku çap bike ew jî dê bê desteserkirin. Çapxane tekneya debarê ye. Kurdî bi awayekî fîîlî hatiye girtin. Welat ji ber ev yek texmîn kir bi awayekî sembolîk fotokopî zêde kir û belav kir. Niha derbasi weşangeriya înternetê bûn. Lê dîsa li pêş wê RTUK heye. Ev nîşan dide ku hikûmet tehamul nake." 

 

GIRTINA DEMOKRASIYÊ JI BO ÇAPEMENIYA CÎHANÊ WINDAKIRINA KOZIKÊ YE

 

Estukyan, destnîşan kir ku piştî Rojnameya Ozgurlukçu Demokrasî hat girtin êdî nikarin wekî berê pêvajo û geşedanên li Efrîn û derdorên din rast bişopînin û wiha got: "Edî em wekî berê nikarin rastiya geşedanan bişopînin. Em ji Efrînê bê agahî ne. Gelek tiştên balkêş pêş dikevin. Lê em niha nizanin rastî çîye. Ne tenê ji bo rojnamegeriya kurd, ji bo rojnamegeriya hemû cîhanê windakirina kozikan e. 

 

'MIN AZAD LI OZGURLUKÇU DEMOKRASÎ DINIVÎ'

 

Estukyan, da zanîn ku dema wî li Rojnameya Ozgurlukçu Demokrasî dinivîsî serbest û azad mijar û naverok diyar dikir û wiha got: "Tu kesî nedigot vê hefteyê vê mijarê binivîsin. Cilê ku min azad lê dinivisî. Ji bo min windahiyek mezin e. Cihê azadiya ramanê min bû." 

 

Estukyan, bal kişand ser firotina Koma Medya ya Dogan jî û wiha bi dawî kir: "Hemû rojname, televîzyon û çapemeniya girêdayî Dogan dest guhert. Firotin şîrketa nêzî îktîdarê. Beriya wê înternet xistin kontrolê. Ji niha de amadekariya hilbijartina 2019'an dikin. Niha televîzyon û weşanên li dervê welat weşan û rojnamegeriyê dikin hene. Welate me di rojên zahmet û dijwar re derbas dibin. Lê ez bawer dikim ku em dê van rojan derbas bikin. 

 

MA / Bilal Seçkin