ÎZMÎR - Şaxa ÎHD’a Îzmîrê, diyar kir ku rayedarên girtîgeha Akhîsarê rapora ATK a girtiyê nexweş Huseyîn Sari, dema sewq kirin winda kirin. ÎHD’ê xwest, bi Sari re hemû girtiyên nexweş bên berdan.
Şaxa Komeleya Mafê Mirovan (ÎHD) a Îzmîrê, di hefteya 427’emîn de çalakiya xwe ya “Bila winda bên dîtin, faîl bên darizandin” û “Girtiyên nexweş bên berdan” li dar xist û daxwaza serbest berdana girtiyan kir. Xizmên girtiyan û ÎHD’î li ber avahiya Serokatiya Konakê li hev kom bûn û li ser navê ÎHD’ê Serokê Şaxa ÎHD’ê Alî Aydin axivî.
Aydin, diyar kir ku mîna hemû girtîgehê Tirkiyeyê, di girtîgehên Herêma Egeyê de jî binpêkirinên mafan di asta herî jor de tên jiyîn û wiha got: “Binçavkirin û girtin pir zêde bûne. Ji ber vê di girtîgehan de cih nemaye û hikûmet hewl dide girtîgehên nû ava bike. Bi darê zorê girtiyan sîrgûn dikin. Gava girtiyan sîrgûn dikin, pêkanînên hejmar ser piyan û lêgerîna tazî li ser wan ferz dikin. Girtiyên li dijî van pêkanîn derdikevin jî derp dikin.”
‘GIRTIYÊN DERP DIKIN NABIN NEXWEŞXANÊ’
Aydin, di dewama axaftina xwe de wiha got: “Di nava 5 girtiyên ji Girtîgeha Tîpa F a Boluyê sîrgûnî Girtîgeha Tîpa T a Akhîsara Manîsayê kirin, girtiyên nexweş jî hebûn. Gartiyenan 5 girtî di lêgerîna tazîre derbas kirin û derp kirin. Girtî Hasan Şaşmaz ê bigiranî nexweşe, ji aliyê gardiyenan ve hat dertkirin û ji ber serê wî li dîwar xistin xwîn diçe ser mejiyê wî û nebirin nexweşxanê. Rayedarên wiha nêzî girtiyan dibin sûç dikin û ev yek nayê qebûl kirin.”
DI DEMA SEWQÊ DE RAPORA ŞANDEYÊ WINDA KIRIN
Aydin bal kişand ser rewşa girtiyê nexweş Huseyîn Sari yê di Girtîgeha Akhîserê de dimîne jî û wiha bi dawî kir: “Piştî sîrgûnê di ketina Girtîgeha Akhîsarê de jî Sari hat derp kirin û rayedarên girtîgehê rapora wî ya ATK’ê winda dikin. Divê cardin rapora ATK’ê bê dîtin û Sarî bê dermankirin û berdan. Em ji rayedaran re dibêjin êdî dest ji van pêkanînên xwe berdin. Di girtîgehan de jiyana mirovan di talokê dene. Em dixwazin bi Sari re hemû girtiyên nexweş bên berdan.”