STENBOL – Piştî qeyûm tayînî rojnameya Ozgurlukçu Demokrasî hat kirin, polîsan şev nîvê şevê bi ser mala xebatkarên rojnameyê de girtin û herî kêm 4 kes hatin binçavkirin.
Polîs û tîmên taybet şev nîvê şevê bi ser malên xebatkarên Rojnameya Ozgurlukçu Demokrasî de girtin û lêgerîn pêk anîn. Di lêgerînê de polîsan dest danî ser rojname, wêne, pirtûk û maskeyên gazê ku di dema şopandina nûçeyan de tê bikaranîn. Hat diyar kirin ku polîsan gelek rojnameger binçavkirine. Tevî rojnameger Reyhan Hacioglu, Hicran Urun, Pinar Tarlak û xebatkarê rojnameyê yê berê Mehmet Beyazit jî di navde gelek kesên din jî hatine binçavkirin.
BERÊ JÎ 27 KES HATIBÛN BINÇAVKIRIN
Polîsan şev nîvê şevê saet di 00:30'an ê 28'ê Adarê de bi ser Navenda Îdareyê û çapxaneya Rojnameya Ozgurlukçu Demokrasî ya li Beyoglu ya Stenbolê de girtin. Polisan heta saet 03.00'an li avahiyên rojnameyê lêgerîn kirin. Polîsan li avahiya Rojnameyê û li çapxaneya Rojnameyê legerîn kirin û 27 xebatkarên Rojname û çapxaneyê binçavkirin. Rayedarên erkdar ên Fota Sîgorta ya Mevdûata Tasarrufê (TMSF) jî rojname û çapxane desteser kirin û qeyûm tayîn kirin. 27 xebatkarên ku hefteyek e di bin çavan e ne parêzeran îtîraz kirin ku serbest bên berdan. Lê dozger îtîraza parêzeran red kir û binçavkirina rojnamegeran hefteyek dirêj kir.